નવી દિલ્હી: સૌથી મહત્વપૂર્ણ અને કિંમતી ધાતુઓમાં ગણવામાં આવતા સોનાના (Gold) ભાવમાં સતત વધારો થઈ રહ્યો છે. તેમજ જબરદસ્ત તેજી વચ્ચે સોનાએ નવા ઈતિહાસ સાથે નવા નાણાકીય વર્ષની (New fiscal year) શરૂઆત કરી છે. આજે 1 એપ્રિલના રોજ, આંતરરાષ્ટ્રીય બજારમાં સોનાના ભાવના ઇતિહાસના નવા ઉચ્ચ સ્તરે પહોંચી ગયા છે.
આજે 1 એપ્રિલ સોમવારે સોનાના ભાવમાં જોરદાર ઉછાળો જોવા મળ્યો હતો. 24 કેરેટ સોનાના 10 ગ્રામની કિંમત 2126 રૂપિયા વધીને 68,960 રૂપિયા પ્રતિ 10 ગ્રામ થઈ ગઈ છે. અગાઉ 28 માર્ચે સોનું 66,834 રૂપિયા પ્રતિ 10 ગ્રામ પર બંધ થયું હતું. ઈન્ડિયન બુલિયન જ્વેલર્સ એસોસિએશન (IBJA)ની વેબસાઈટ પર આ માહિતી આપવામાં આવી હતી.
સોનાનો અત્યાર સુધીનો સૌથી મોંઘો દર
જણાવી દઈએ કે 10 ગ્રામ સોનાની કિંમત 68960 રૂપિયા નોંધાઈ હતી. આ અત્યાર સુધીનો સૌથી વધુ દર છે. અગાઉ સોનાનો મહત્તમ ભાવ રૂ. 68,000ની આસપાસ નોંધાયો હતો. દરમિયાન છેલ્લા કેટલાક અઠવાડિયાથી સોનું 66 હજારથી 68 હજારની રેન્જમાં ટ્રેંડ થઈ રહ્યું હતું.
22, 20,18 અને 14 કેરેટનો રેટ શું છે?
IBJA વેબસાઈટ પર આપવામાં આવેલી માહિતી અનુસાર 22 કેરેટ સોનાની કિંમત વધીને 67,310 રૂપિયા પ્રતિ 10 ગ્રામ થઈ ગઈ હતી. તેમજ 20 કેરેટ સોનાની કિંમત 10 ગ્રામ દીઠ 61,380 રૂપિયા, 18 કેરેટ સોનાની કિંમત 55,860 રૂપિયા પ્રતિ 10 ગ્રામ અને 14 કેરેટ સોનાની કિંમત પ્રતિ 10 ગ્રામ રૂપિયા 44,480 થઈ ગઈ હતી.
આંતરરાષ્ટ્રીય બજારોમાં સોના અને ચાંદીના ભાવ
સ્થાનિક બજારોની સાથે સાથે આંતરરાષ્ટ્રીય સ્તરે પણ સોના અને ચાંદીમાં જબરદસ્ત વૃદ્ધિ જોવા મળી રહી હતી. આંતરરાષ્ટ્રીય બજારમાં સોનાનો ભાવ 1.77 ટકા વધીને રૂ. 2,278 પ્રતિ ઔંસ અને ચાંદીનો ભાવ 1.31 ટકા વધીને 25.24 ડોલર પ્રતિ ઔંસ થયો હતો. યુએસ ફેડ દ્વારા વ્યાજદરમાં ઘટાડો કરવાના સંકેત આપ્યા બાદ સોના અને ચાંદીના ભાવમાં વધારો થયો હતો.
MCX પર સોના અને ચાંદીના ભાવમાં વધારો થયો
આંતરરાષ્ટ્રીય બજારોમાં સોના અને ચાંદીના ભાવમાં વધારાની અસર વાયદાના વેપારમાં પણ જોવા મળી હતી. બપોરે 2 વાગ્યા સુધી, 05 જૂન, 2024 માટે સોનાનો કરાર 1.58 ટકાના વધારા સાથે રૂ. 68,770 પ્રતિ 10 ગ્રામ હતો અને 03 મે, 2024નો ચાંદીનો કરાર 1.02 ટકાના વધારા સાથે રૂ. 75,817 પ્રતિ કિલોગ્રામ હતો.
