ગાંધીનગર,તા.24
ગુજરાતમાં છેલ્લા કેટલાક સમયથી ઈંધણની અછતને લઈને ચાલી રહેલી અટકળો પર વિરામ મુકતા અન્ન, નાગરિક પુરવઠા અને ગ્રાહક બાબતોના વિભાગના અધિક મુખ્ય સચિવ મોના ખંધારે રાજ્યની જનતાને આશ્વસ્ત કર્યા છે. તેમણે મીડિયા સાથેની વાતચીતમાં સ્પષ્ટ કર્યું હતું કે રાજ્યમાં પેટ્રોલ અને ડીઝલનો પૂરતો સ્ટોક ઉપલબ્ધ છે અને કોઈ પણ પ્રકારના રેશનિંગની જરૂરિયાત નથી.
પેટ્રોલ-ડીઝલ અંગે સ્પષ્ટતા
મોના ખંધારે જણાવ્યું હતું કે, કેન્દ્ર સરકાર દ્વારા ગુજરાતમાં પેટ્રોલ અને ડીઝલનો પૂરતો બફર સ્ટોક પૂરો પાડવામાં આવ્યો છે. વિતરણ વ્યવસ્થામાં કોઈ પણ પ્રકારનો અવરોધ નથી. નાગરિકોને ખોટી ભ્રામક અફવાઓ પર ધ્યાન ન આપવા અને પેટ્રોલ પંપ પર બિનજરૂરી લાઈનો ન લગાવવા વિનંતી કરવામાં આવી છે. ઈંધણના ભાવમાં કોઈ વધારો કે જથ્થામાં કાપ મૂકવામાં આવ્યો નથી.
કોમર્શિયલ LPG ફાળવણીમાં મોટો વધારો
રાજ્યમાં કોમર્શિયલ ગેસના વપરાશકારો માટે મહત્વના નિર્ણય લેવામાં આવ્યા છે:
- નવા નિયમો: જ્યાં PNG (પાઈપ્ડ નેચરલ ગેસ) નેટવર્ક ઉપલબ્ધ નથી, ત્યાં વિવિધ ક્ષેત્રો માટે LPG ફાળવણીની મર્યાદા ૧૦% થી વધારીને ૨૫% કરવામાં આવી છે.
- લાભાર્થી ક્ષેત્રો: ફિશરીઝ ઉદ્યોગ, હોટેલ-રેસ્ટોરન્ટ, કોર્પોરેટ કેન્ટીન, ફૂડ પ્રોસેસિંગ અને ઇન્ડસ્ટ્રીયલ કેન્ટીન જેવા ક્ષેત્રોને આ વધારાનો લાભ મળશે.
- MSME સેક્ટર: દરેક જિલ્લામાં રોજગારી આપતા મહત્વના MSME એકમોને ઓળખી તેમને પણ ૧૦% ની મર્યાદામાં કોમર્શિયલ LPG પૂરો પાડવામાં આવશે.
- આવશ્યક સેવાઓ: હોસ્પિટલો અને શૈક્ષણિક સંસ્થાઓને ૧૦૦% જ્યારે ફાર્મા અને ડેરી ઉદ્યોગને ૭૦% જથ્થો મળતો રહેશે.
PNG નેટવર્કને પ્રોત્સાહન અને LPG સિલેન્ડર સરેન્ડર
સરકાર હવે વ્યવસાયિક એકમોને LPG ને બદલે PNG કનેક્શન તરફ વાળવા પર ભાર મૂકી રહી છે
- જે એકમો પાસે બંને કનેક્શન છે, તેમણે PNG નો વપરાશ શરૂ કરી LPG કનેક્શન O.M.C. (ઓઈલ માર્કેટિંગ કંપની) ને પરત (Surrender) કરવાનું રહેશે.
- અમદાવાદ જેવા શહેરોમાં નવા PNG કનેક્શન આપવાની કામગીરી પ્રાધાન્યના ધોરણે શરૂ કરાઈ છે. આગામી ૩ માસમાં અંદાજે ૯૦૦ સોસાયટીઓને PNG નેટવર્ક હેઠળ આવરી લેવાનું લક્ષ્ય છે.
- PNG કનેક્શન માટેની મંજૂરી પ્રક્રિયા ઝડપી બનાવવા CGD કંપનીઓને ૨૪ કલાકમાં ‘રાઈટ ઓફ વે’ (ROW) ની પરવાનગી કોઈ પણ ચાર્જ વગર આપવામાં આવશે.
અધિક મુખ્ય સચિવે જણાવ્યું કે હોસ્પિટલો અને શૈક્ષણિક સંસ્થાઓને 100 ટકા LPG સપ્લાય ચાલુ રહેશે. જ્યારે ફાર્માસ્યુટિકલ, ડેરી, સીડ પ્રોસેસિંગ અને એરલાઇન/રેલવે કેન્ટીન જેવા ક્ષેત્રોને 70 ટકા સુધી ફાળવણી કરવામાં આવશે. બાકી અન્ય સેમી-એસેન્શિયલ સેક્ટરમાં 25 ટકા સુધી મર્યાદા રાખવામાં આવી છે.
PNG કનેક્શન માટે ખાસ અભિયાન
મોના ખંધારે વધુમાં જણાવ્યું કે જ્યાં PNG નેટવર્ક ઉપલબ્ધ છે ત્યાં નવા કનેક્શન ઝડપી આપવામાં આવશે અને LPG કનેક્શનને તબક્કાવાર સરેન્ડર કરાવવામાં આવશે. CGD (City Gas Distribution) કંપનીઓ દ્વારા નવા PNG કનેક્શન શરૂ કરવામાં આવશે અને OMC દ્વારા LPG સરેન્ડર પ્રક્રિયા હાથ ધરાશે.
રાજ્ય સરકાર દ્વારા આ સમગ્ર પ્રક્રિયા પર નજીકથી દેખરેખ રાખવામાં આવશે અને જિલ્લા કક્ષાએ અધિકારીઓ દ્વારા અમલ સુનિશ્ચિત કરવામાં આવશે.
અમદાવાદમાં વિશેષ અભિયાન
અમદાવાદ શહેરમાં પહેલેથી જ મોટા પ્રમાણમાં કોમર્શિયલ અને ઘરેલુ કનેક્શન PNGમાં પરિવર્તિત કરવામાં આવ્યા છે. આગામી ત્રણ મહિનામાં આશરે 800થી વધુ સોસાયટીઓને PNG નેટવર્ક સાથે જોડવાનો લક્ષ્ય રાખવામાં આવ્યો છે. મોના ખંધારે અંતમાં જણાવ્યું કે આ નિર્ણયથી ઊર્જા વ્યવસ્થાપનમાં સુધારો થશે, પર્યાવરણને ફાયદો થશે અને નાગરિકોને વધુ સુવિધાજનક અને સતત ગેસ સપ્લાય મળશે.
