નવી દિલ્હી: ભારતીય જનતા પાર્ટી (BJP) એ લોકસભા ચૂંટણી (Lok Sabha Elections) માટે ઉમેદવારોની છઠ્ઠી યાદી (list) જાહેર કરી છે. યાદીમાં ત્રણ ઉમેદવારોના નામ છે. ભાજપે રાજસ્થાનના દૌસાના સાંસદ જસકૌર મીણાની ટિકિટ રદ્દ કરીને કન્હૈયા લાલ મીણાને ઉમેદવાર જાહેર કર્યા છે. આ સાથે જ કરૌલી ધોલપુરના સાંસદ ડૉ. મનોજ રાજૌરિયાની ટિકિટ પણ રદ કરવામાં આવી છે. ભાજપે મનોજની જગ્યાએ ઈન્દુ દેવી જાટવને ટિકિટ આપી છે.
મણિપુર માટે ઉમેદવારની જાહેરાત
આ સાથે જ ભાજપે પણ મણિપુરની એક સીટ માટે પોતાના ઉમેદવારના નામની જાહેરાત કરી દીધી છે. મણિપુર ઈનરના સાંસદ કેન્દ્રીય મંત્રી રાજકુમાર રંજન સિંહની ટિકિટ કાપવામાં આવી છે. રાજકુમારની જગ્યાએ ભાજપે ટી બસંત કુમાર સિંહને ઉમેદવાર બનાવ્યા છે.
રવિવારે 7 ઉમેદવારોની જાહેરાત કરવામાં આવી હતી
આ પહેલા અગાવ રવિવારે ભાજપે લોકસભા ચૂંટણી માટે રાજસ્થાનના વધુ સાત ઉમેદવારોની યાદી જાહેર કરી હતી. પાર્ટીએ બે વર્તમાન સાંસદો ટોંક-સવાઈ માધોપુરથી સુખબીર સિંહ જૌનપુરિયા અને અજમેરથી ભગીરથ ચૌધરીને ફરીથી મેદાનમાં ઉતાર્યા છે. ભગીરથ ચૌધરી ગયા વર્ષે ડિસેમ્બરમાં વિધાનસભાની ચૂંટણીમાં મેદાનમાં ઉતર્યા હતા. પરંતુ તેઓ ચૂંટણી હારી ગયા હતા. પાર્ટીએ જયપુર ગ્રામીણથી રાવ રાજેન્દ્ર સિંહ અને ઝુનઝુનુથી શુભકરણ ચૌધરીને ટિકિટ આપી છે. બંને પૂર્વ ધારાસભ્ય છે.
મહિલાઓને પણ ટિકિટ મળી હતી
પાર્ટી દ્વારા જાહેર કરાયેલા સાત ઉમેદવારોમાં ત્રણ મહિલા છે. આજે જાહેર થયેલા ઉમેદવારોમાં એક મહિલા છે. ભાજપે ગંગાનગરથી પ્રિયંકા બાલન, જયપુરથી મંજુ શર્મા અને રાજસમંદથી મહિમા વિશ્વેશ્વર સિંહને મેદાનમાં ઉતાર્યા છે. મહિમા વિશ્વેશ્વર સિંહ ઉદયપુરના ભૂતપૂર્વ શાહી પરિવારના સભ્ય છે. તે ભાજપના ધારાસભ્ય વિશ્વરાજ સિંહ મેવાડની પત્ની છે. તે રાજપૂત પ્રભુત્વવાળી રાજસમંદ બેઠક પરથી લોકસભા ચૂંટણી લડશે. તેમજ 2023ની વિધાનસભા ચૂંટણીમાં સાંસદ દિયા કુમારી ધારાસભ્ય તરીકે ચૂંટાયા બાદ રાજસમંદ લોકસભા બેઠક ખાલી પડી હતી.
અત્યાર સુધીમાં 24 ઉમેદવારોના નામ જાહેર કરવામાં આવ્યા છે
કોંગ્રેસે દૌસાથી મુરારી લાલ મીણાને પોતાના ઉમેદવાર જાહેર કર્યા છે. કોંગ્રેસે કરૌલી-ધોલપુર લોકસભા બેઠક પરથી ભજનલાલ જાટવને ટિકિટ આપી છે. તેમજ ભાજપે રાજ્યની 25માંથી 24 લોકસભા બેઠકો માટે ઉમેદવારો જાહેર કર્યા છે.
