રાષ્ટ્રવાદી કોંગ્રેસ પાર્ટીના વડા અને રાજ્યસભા સાંસદ Sharad Pawarની તબિયત અંગે ચાલી રહેલી ચર્ચાઓ વચ્ચે હવે રાહતના સમાચાર આવ્યા છે. હળવા ડિહાઇડ્રેશનની ફરિયાદ બાદ તેમને પુણેના Ruby Hall Clinicમાં દાખલ કરવામાં આવ્યા હતા, પરંતુ ડૉક્ટરોના જણાવ્યા અનુસાર તેમની હાલત સંપૂર્ણપણે સ્થિર છે અને તમામ મેડિકલ રિપોર્ટ સામાન્ય આવ્યા છે. હોસ્પિટલના વરિષ્ઠ તબીબોએ માહિતી આપી કે 85 વર્ષીય પવારને સાવચેતીના ભાગરૂપે નિરીક્ષણ હેઠળ રાખવામાં આવ્યા છે. હાલમાં તેમને ડ્રિપ દ્વારા પ્રવાહી આપવામાં આવી રહ્યા છે અને તેમના સ્વાસ્થ્ય પર સતત નજર રાખવામાં આવી રહી છે. મુખ્ય હૃદયરોગ નિષ્ણાતે જણાવ્યું કે હવે તેમની તબિયત સ્થિર છે, ચિંતા કરવાની જરૂર નથી. તેમને આગામી 48 કલાકમાં રજા આપવામાં આવે તેવી શક્યતા વ્યક્ત કરવામાં આવી છે.
ડૉક્ટરોના જણાવ્યા મુજબ, પવારને અગાઉ 9 ફેબ્રુઆરીએ છાતીમાં ચેપ લાગવાથી પણ આ જ હોસ્પિટલમાં દાખલ કરવામાં આવ્યા હતા અને 14 ફેબ્રુઆરીએ તેમને રજા આપવામાં આવી હતી. ઉંમરને ધ્યાનમાં રાખીને નિયમિત તબીબી તપાસ જરૂરી હોવાની વાત તબીબોએ પુનરાવર્તિત કરી છે, જોકે હાલ પરિસ્થિતિ નિયંત્રણમાં હોવાનું સ્પષ્ટ કરવામાં આવ્યું છે. શરદ પવારની લાંબી અને પ્રભાવશાળી રાજકીય સફર રહી છે. બારામતીને પવાર પરિવારનો મજબૂત રાજકીય ગઢ માનવામાં આવે છે, જ્યાંથી તેઓ અનેક વખત ધારાસભ્ય તરીકે ચૂંટાયા હતા. તેમની પુત્રી સુપ્રિયા સુળે સતત બારામતીથી સંસદ સભ્ય તરીકે ચૂંટાઈ આવી છે. 2023માં પક્ષના વિભાજન બાદ પણ પરિવારનો પ્રભાવ અકબંધ રહ્યો છે. પવારના પરિવાર વિશે વાત કરીએ તો તેમના પિતા ગોવિંદરાવ પવાર સહકારી ચળવળ સાથે જોડાયેલા હતા, જ્યારે માતા શારદાબાઈ શિક્ષણપ્રેમી અને સામાજિક પ્રવૃત્તિઓમાં સક્રિય હતાં. તેમની પત્ની પ્રતિભા પવાર ભૂતપૂર્વ ક્રિકેટર સદાશિવ શિંદેની પુત્રી છે. હાલમાં સમર્થકો અને કાર્યકરો દ્વારા પવારના ઝડપી સ્વસ્થ થવાની પ્રાર્થનાઓ કરવામાં આવી રહી છે. તબીબોના નિવેદન બાદ રાજકીય વર્તુળોમાં પણ રાહતનો માહોલ જોવા મળી રહ્યો છે.
