નવી દિલ્હી: કોરોના વાયરસ (Corona Virus)ના BF.7 વેરિઅન્ટના જોખમને ધ્યાનમાં રાખીને કેન્દ્ર સરકાર (Central Government) એલર્ટ (Alert) મોડમાં છે. સરકારે ચીન સહિત પાંચ દેશોમાંથી આવતા મુસાફરો માટે RT-PCR ટેસ્ટ ફરજિયાત બનાવ્યો છે. કેન્દ્રીય સ્વાસ્થ્ય મંત્રી મનસુખ માંડવિયાએ ગુરુવારે આ માહિતી આપી હતી. આરોગ્ય મંત્રી મનસુખ માંડવિયાએ જણાવ્યું કે, 1 જાન્યુઆરી, 2023થી ચીન, હોંગકોંગ, જાપાન, દક્ષિણ કોરિયા, સિંગાપોર અને થાઈલેન્ડથી આવતા મુસાફરો માટે RT-PCR ટેસ્ટ ફરજિયાત કરવામાં આવ્યો છે. તેઓએ મુસાફરી પહેલા તેમનો રિપોર્ટ એર સુવિધા પોર્ટલ પર અપલોડ કરવાનો રહેશે.
આગામી 40 દિવસ દેશ માટે ભારે
કેન્દ્રએ આ નિર્ણય એવા સમયે લીધો છે જ્યારે સ્વાસ્થ્ય મંત્રાલયના સૂત્રોએ કહ્યું હતું કે આગામી 40 દિવસ મહત્વપૂર્ણ છે કારણ કે જાન્યુઆરીમાં ભારતમાં કોવિડ-19ના કેસ ઝડપથી વધી શકે છે. તાજેતરમાં, કેન્દ્ર સરકારે એરપોર્ટ પર વિદેશથી આવતા મુસાફરોના રેન્ડમ સેમ્પલિંગ કરવાનો નિર્ણય લીધો હતો. અધિકારીએ જણાવ્યું હતું કે 6000 લોકોની તપાસમાં 39 લોકો પોઝિટિવ મળ્યા છે. આ ઉપરાંત નવા વર્ષની ઉજવણીને ધ્યાનમાં રાખીને કેન્દ્ર સહિત રાજ્યોની સરકારો એલર્ટ મોડ પર આવી ગઈ છે. કર્ણાટકમાં માસ્ક ફરજિયાત કરવામાં આવ્યું છે. તો ત્યાં દિલ્હીથી ચેન્નાઈના એરપોર્ટ પર ટેસ્ટિંગ વધારી દેવામાં આવ્યું છે. હિમાચલમાં, વધતા વેચાણ વચ્ચે જાહેર સ્થળોએ માસ્કનો ઉપયોગ કરવાની ચર્ચા હતી. ઉત્તરાખંડ અને મહારાષ્ટ્રના એરપોર્ટ પર કોરોના તપાસના આદેશ આપવામાં આવ્યા છે.
સરકારની લોકોને સતર્ક રહેવા અપીલ
એક અધિકારીએ કહ્યું, “ભૂતકાળમાં એવું જાણવા મળ્યું હતું કે પૂર્વ એશિયામાં કોરોનાનો ભોગ બન્યાના 30-35 દિવસ પછી ભારતમાં રોગચાળાની નવી લહેર આવી હતી. આ એક વલણ રહ્યું છે. આરોગ્ય મંત્રાલયના સૂત્રોએ જો કે, કહ્યું કે ચેપની તીવ્રતા ઓછી છે. જો કોવિડની નવી લહેર આવશે તો પણ મૃત્યુ દર અને ચેપગ્રસ્ત લોકોના હોસ્પિટલમાં દાખલ થવાનો દર ઘણો ઓછો હશે. ચીન અને દક્ષિણ કોરિયા સહિતના કેટલાક દેશોમાં કોરોનાના કેસ ઝડપથી વધી રહ્યા છે, સરકારે લોકોને સતર્ક રહેવા કહ્યું છે અને રાજ્યો અને કેન્દ્રશાસિત પ્રદેશોને કોઈપણ અણધારી પરિસ્થિતિનો સામનો કરવા માટે તૈયાર રહેવા જણાવ્યું છે.
અમેરિકા અને ઇટલીમાં પણ ટેસ્ટ ફરજીયાત
તાજેતરમાં ઇટાલીએ ચીનથી આવતા તમામ પ્રવાસીઓ માટે કોરોના ટેસ્ટ ફરજિયાત બનાવ્યો છે. બેઇજિંગથી મિલાન સુધીની બે ફ્લાઈટમાં 50% થી વધુ મુસાફરોના કોવિડ ટેસ્ટ પોઝિટિવ આવ્યા બાદ ઈટાલીએ આ નિર્ણય લીધો છે. જણાવી દઈએ કે મિલાન ઈટાલીનું પ્રખ્યાત શહેર છે. આ પ્રકારના મામલા સામે આવ્યા બાદ ઇટાલીએ ચાઇનીઝ પ્રવાસીઓ માટે કોવિડ ટેસ્ટ ફરજિયાત બનાવ્યો છે. જણાવી દઈએ કે કોરોના સંકટ વચ્ચે અમેરિકાએ પણ ચીનના પ્રવાસીઓ માટે કોરોના ટેસ્ટ ફરજિયાત કરી દીધો છે. આવું કરનાર અમેરિકા વિશ્વનો 5મો દેશ બની ગયો છે.
