દિલ્હી (Delhi) કેન્ટ વિસ્તારમાં 9 વર્ષની બાળકી પર બળાત્કાર અને હત્યાના કેસ (Rape and murder case)માં ટ્વિટરે આજે હાઈકોર્ટ (High court)ને જણાવ્યું હતું કે રાહુલ ગાંધી (Rahul gandhi)એ તેમની નીતિનો ભંગ કર્યો છે.
ટ્વિટરે કોંગ્રેસના સાંસદ રાહુલ ગાંધીએ પોસ્ટ કરેલી ટ્વીટ (Tweet)ને ડિલીટ કરી દીધી છે અને તેમનું એકાઉન્ટ બંધ કરવાનો દાવો પણ કર્યો છે. ટ્વિટર તરફથી ઉપસ્થિત રહેલા વરિષ્ઠ વકીલ સાજન પૂવૈયાએ કોર્ટને કહ્યું કે અમે તે ટ્વીટને હટાવી દીધું છે, કારણ કે, તે અમારી નીતિ વિરુદ્ધ પણ છે. ચીફ જસ્ટિસ ડી.એન.પટેલ અને જસ્ટિસ જ્યોતિ સિંહની ખંડપીઠે અરજી પર સુનાવણી કરી હતી. સામાજિક કાર્યકર મકરંદ સુરેશ મહાડલેકર દ્વારા એડવોકેટ ગૌતમ ઝા, પંકજ કુમાર અને સ્વેતા ઝા દ્વારા અરજી દાખલ કરવામાં આવી હતી.
તમને જણાવી દઈએ કે એક નિર્દોષના બળાત્કાર અને હત્યાના કેસમાં કોંગ્રેસના સાંસદ રાહુલ ગાંધી સામે તેમના પરિવારના સભ્યોનો ફોટો સોશિયલ મીડિયા પર વાયરલ કરવા બદલ બાળ અધિકાર અધિનિયમ અને પોક્સો એક્ટ હેઠળ કેસ નોંધવાની માંગણી કરવામાં આવી હતી. આ અંગે હાઇકોર્ટમાં દાખલ કરવામાં આવેલી અરજી પર આજે સુનાવણી હાથ ધરવામાં આવી હતી.
સામાજિક કાર્યકર્તા મકરંદ સુરેશ મહાડલેકરે એડવોકેટ ગૌતમ ઝા મારફતે દાખલ કરેલી અરજીમાં જણાવ્યું હતું કે, રાહુલ ગાંધીએ પીડિત પરિવારના સભ્યોની ઓળખ જાહેર કરીને બાળ અધિકાર અધિનિયમ અને પોક્સો એક્ટનું ઉલ્લંઘન કર્યું છે. તેમની સામે યોગ્ય કાનૂની કાર્યવાહી થવી જોઈએ અને દિલ્હી પોલીસને તેમની વિરુદ્ધ એફઆઈઆર નોંધવાનો નિર્દેશ આપવો જોઈએ. આ સાથે, પીડિત પરિવારની ઓળખ દૂર કરવા માટે ટ્વિટરને પણ કહેવું જોઈએ.
અરજદારે કહ્યું કે, છોકરીના સગાની ઓળખ રાજકીય લાભ માટે જાહેર કરવામાં આવી છે, જે તદ્દન અન્યાયી છે. તેમણે એમ પણ કહ્યું કે પીડિત પરિવારની ઓળખ સાર્વજનિક કરીને તેમની પીડા વધારી છે. તે તેમના જીવનને પણ જોખમમાં મૂકી શકે છે. બાળકો સામે આવું કૃત્ય ગંભીર ગુનો છે.
