સુરતના સુરત ઇન્ટરનેશનલ એરપોર્ટ પર ગત બુધવારે બનેલી એક ગંભીર ઘટના હવે ચર્ચાનો વિષય બની છે. હૈદરાબાદથી આવી રહેલી IndiGoની ફ્લાઇટ લેન્ડિંગ માટે રનવે પર ઉતરી રહી હતી ત્યારે અચાનક એક શિયાળ વિમાનની અડફેટે આવી ગયું હતું. લેન્ડિંગની ઊંચી સ્પીડને કારણે વિમાનને જોરદાર ઝાટકો લાગ્યો, જેના કારણે ફ્લાઇટમાં સવાર 150થી વધુ મુસાફરોમાં ભયનો માહોલ સર્જાયો હતો. માહિતી મુજબ, પાયલોટે લેન્ડિંગ પહેલા જ એર ટ્રાફિક કંટ્રોલ (ATC)ને SOS કોલ કરીને રનવે પર પ્રાણી હોવાની ચેતવણી આપી હતી. છતાં પણ થોડા જ સમયમાં આ અથડામણ બની ગઈ. આ પછી બીજી એક ફ્લાઇટ વેન્ચુરા એર કનેક્ટના પાયલોટે રનવે પર શિયાળના બે ટુકડા પડેલા હોવાની જાણ કરી, જેનાથી ઘટના વધુ ગંભીર બની હોવાનું સામે આવ્યું.
ટક્કર પછી તરત જ એરપોર્ટ તંત્ર હરકતમાં આવ્યું. રનવેને થોડા સમય માટે બંધ કરી દેવાયો અને વન વિભાગને જાણ કરવામાં આવી. શિયાળના અવશેષોને કબજે લઈને એરપોર્ટ વિસ્તારમાં સર્ચ ઓપરેશન શરૂ કરાયું. રનવે અને આસપાસના વિસ્તારમાં પાંજરા ગોઠવી અન્ય કોઈ પ્રાણી તો નથી ને તેની પણ તપાસ હાથ ધરાઈ. ઘટના બાદ ફ્લાઇટને સુરક્ષિત રીતે એપ્રન સુધી લાવવામાં આવી, જે પાયલોટની સમજદારી અને કુશળતાનું ઉદાહરણ છે. ત્યારબાદ વિમાનને ગ્રાઉન્ડેડ રાખીને તેની એન્જિન સહિત તમામ ટેકનિકલ તપાસ કરવામાં આવી. સઘન તપાસ બાદ કોઈ ગંભીર નુકસાન ન હોવાનું જાણવા મળ્યું અને એ જ વિમાનને રાત્રે ફરી હૈદરાબાદ જવા માટે ટેકઓફ કરવાની મંજૂરી આપવામાં આવી.
સૂત્રો મુજબ, આ ઘટના શરૂઆતમાં દબાવી દેવાનો પ્રયાસ થયો હતો, પરંતુ વિવિધ વિભાગોની તપાસ બાદ હકીકતો બહાર આવી. હવે આ મુદ્દે એરપોર્ટ ઓથોરિટી અને વન વિભાગ બંને દ્વારા વિગતવાર તપાસ ચાલી રહી છે. આ ઘટનાએ એરપોર્ટની સુરક્ષા વ્યવસ્થા પર મોટા સવાલો ઊભા કર્યા છે. હાઈ-સિક્યુરિટી વોલ હોવા છતાં શિયાળ જેવા જંગલી પ્રાણી રનવે સુધી કેવી રીતે પહોંચી શકે? આ પ્રશ્નનો જવાબ શોધવા માટે તપાસ ચાલુ છે. સદભાગ્યે, કોઈ જાનહાનિ થઈ નથી, પરંતુ આ ઘટના ભવિષ્યમાં વધુ સાવચેતી અને કડક સુરક્ષા પગલાં લેવા માટે ચેતવણી સમાન છે.
