આસામના રાજકારણમાં સીએમ હિમંતા બિસ્વા શર્માની પત્ની સાથે જોડાયેલા પાસપોર્ટ વિવાદને લઈને ભારે ગરમાવો આવ્યો છે. કોંગ્રેસ પાર્ટીએ આરોપ લગાવ્યો છે કે તેમની પત્ની પાસે વિદેશી પાસપોર્ટ છે, જેને લઈને સવાલો ઊભા થયા છે. આ મુદ્દે ભાજપે કોંગ્રેસ પર જોરદાર પ્રહાર કર્યો છે અને આ આરોપોને સંપૂર્ણપણે ખોટા ગણાવ્યા છે. ભાજપના રાજ્યસભાના સાંસદ અને પ્રવક્તા સુધાંશુ ત્રિવેદીએ કોંગ્રેસના તમામ આરોપોને નકારી કાઢતા કહ્યું કે રજૂ કરાયેલા દસ્તાવેજો વિશ્વસનીય નથી. તેમના મુજબ, કોંગ્રેસ દ્વારા બતાવવામાં આવેલા દસ્તાવેજોમાં અનેક ગેરસમજ અને ભૂલો છે. જેમ કે નામની જોડણી ખોટી છે, ફોટો બદલવામાં આવ્યો છે અને આઈડી નંબર પણ ખોટી રીતે દર્શાવવામાં આવ્યો છે. તેમણે દાવો કર્યો કે કોંગ્રેસ લોકોમાં ભ્રમ ફેલાવવા માટે નકલી માહિતીનો ઉપયોગ કરી રહી છે. ત્રિવેદીએ ખાસ કરીને પાસપોર્ટ નંબરને લઈને ગંભીર મુદ્દો ઉઠાવ્યો. કોંગ્રેસ દ્વારા જારી કરાયેલ પાસપોર્ટ નંબર (784199657498) ખરેખર ઇજિપ્તીયન નાગરિક, અશરફ અબ્દુલ કાદિર અબ્દુલ સમદ હુસૈનનો છે. જેણે થોડા દિવસ પહેલા પોતાનો પાસપોર્ટ ગુમ થયાની માહિતી સોશિયલ મીડિયા પર આપી હતી. ભાજપનું કહેવું છે કે કોંગ્રેસ આ મુદ્દે ગભરાઈ ગઈ છે અને ચૂંટણી પહેલા ખોટા આરોપો લગાવી રહી છે.
બીજી તરફ, કોંગ્રેસના નેતા પવન ખેરાએ પ્રેસ કોન્ફરન્સ કરીને કહ્યું કે સીએમની પત્ની પાસે યુએઈ, એન્ટિગુઆ-બાર્બુડા અને ઇજિપ્તના પાસપોર્ટ છે. તેમણે દાવો કર્યો કે આ પાસપોર્ટ અલગ-અલગ વર્ષોમાં સમાપ્ત થવાના છે. સાથે જ તેમણે દુબઈમાં બે મિલકતો હોવાનો પણ આરોપ મૂક્યો અને કહ્યું કે આ માહિતી ચૂંટણી સોગંદનામામાં જાહેર કરવામાં આવી નથી. આ સમગ્ર વિવાદ વચ્ચે આસામની રાજનીતિમાં તણાવ વધી ગયો છે, ખાસ કરીને ચૂંટણી પહેલા. બંને પક્ષો એકબીજા પર ગંભીર આરોપો લગાવી રહ્યા છે. ભાજપ આ આરોપોને કોંગ્રેસની રાજકીય ચાલ ગણાવી રહી છે, જ્યારે કોંગ્રેસ પારદર્શિતાની માંગ કરી રહી છે.
