સુરત : પાંડેસરાની ગાયત્રી નગર સોસાયટીમા 2 મહિલાઓને (Women) માર મારતો વિડિયો (Video) સોશ્યલ મીડિયા પર વાયરલ થતા ચર્ચાનો વિષય બન્યો છે. વાયરલ વિડિઓમા બે ટપોરી જેવા દેખાતા યુવકો બે મહિલાઓને ઢોર માર મારતા દેખાતા મહિલા સુરક્ષા સામે અનેક પ્રશ્નો ઉભા થયા છે. હાલ બન્ને મહિલાઓને સારવાર માટે હોસ્પિટલમાં (Hospital) દાખલ કરવામાં આવી હોવાનું જાણવા મળ્યું છે. જોકે હુમલા પાછળ નું કારણ જાણી શકાયું નથી. બન્ને મહિલાઓ પર થયેલો હુમલો પોલીસ સ્ટેશન નજીક જ થતા ચર્ચાનો વિષય બન્યો છે.
સ્થાનિક લોકોએ જણાવ્યું હતું કે મહિલાઓ પર જાહેરમાં થયેલા હુમલો ગંભીર બાબત કહી શકાય છે. મહિલાઓને ધક્કો મારી સળિયા કે ફટકા વડે માર મરાઈ રહ્યો છે. ગૃહ રાજ્ય મંત્રી ના શહેરમાં અને એમના જ મત વિસ્તારમાં થયેલો મહિલા પર હુમલો હવે મહિલાઓની સુરક્ષા સામે પ્રશ્ન બની ગયો છે. આ હુમલા પાછળ જવાબદાર વ્યક્તિઓની ધરપકડ થાય અને જાહેરમાં સરઘસ નીકળે એવી માગ કરવામાં આવી છે.
પાંડેસરા મહિલા પર થયેલા હુમલા પ્રકરણ માં આરોપી નંદન ના પિતા લાલજીભાઈએ જણાવ્યું હતું કે સામાવાળા કુખ્યાત છે, બે નંબરનો ધંધો કરતા એટલે ગાંજા વેચાણ સાથે સંકળાયેલા છે. પાંડેસરામાં એમના નામે અનેક ફરિયાદ છે. 2022માં મારા દીકરા ચંદનની હત્યા પણ આ લોકોએ જ કરી હતી. મંગળવાર ના રોજ એટલે કે 15 મી ઓગસ્ટના રોજ મારા બીજા પુત્ર નંદનને મારવા આવ્યા હતા. પોતાના સ્વબચાવમાં હાથપાઈ થઈ છે. મારો દીકરી કંપનીઓમાં ગાડીઓ ચલાવે છે.
પાંડેસરા પોલીસ સૂત્રોના જણાવ્યા અનુસાર ઘટના 15મી ઓગસ્ટ ના રોજ થઈ હતી. બન્ને પક્ષકારો સામે ગુના દાખલ કરાયા છે. જવાબદારો સામે ફરિયાદ થઈ છે. જે મહિલાઓ પર હુમલો થયો એ મહિલાઓ પણ માથાભારે હોવાનું હાલ જાણવા મળ્યું છે. આખી સોસાયટી આ મહિલાઓથી પરેશાન હોવાનું જાણવા મળ્યું છે. હાલ તપાસ ચાલી રહી છે મહિલાઓ સામાં પક્ષકારને મારવા જ ગયા હોવાની વાત સામે આવી રહી છે.
