ગાંધીનગર,તા.6
ગુજરાતમાં સ્થાનિક સ્વરાજ્યની ચૂંટણીઓ મુક્ત, ન્યાયી અને ભયમુક્ત વાતાવરણમાં સંપન્ન થાય તે માટે રાજ્ય પોલીસ તંત્ર દ્વારા કમર કસવામાં આવી છે. આજે રાજ્યના પોલીસ વડા ડૉ. કે.એલ.એન. રાવે વિડિયો કોન્ફરન્સના માધ્યમથી તમામ પોલીસ કમિશનર અને જિલ્લા પોલીસ વડાઓ સાથે ઉચ્ચ સ્તરીય સમીક્ષા બેઠક યોજી હતી.
સુરક્ષા વ્યવસ્થા અને મહત્વની નિયુક્તિઓ
ચૂંટણી પ્રક્રિયાને આખરી ઓપ આપવા અને કાયદો-વ્યવસ્થા જાળવવા માટે એડીજીપી (ATS) અમિત વિશ્વકર્માની નોડલ અધિકારી તરીકે નિયુક્તિ કરવામાં આવી છે. રાજ્યમાં ૧ એપ્રિલથી આચારસંહિતા અમલી છે, ત્યારે પોલીસ વડાએ સ્પષ્ટ આદેશ આપ્યા છે કે રાજ્યમાં શાંતિપૂર્ણ મતદાન માટે સ્ટેટ પોલીસના તમામ યુનિટોએ સજ્જ રહેવું.
ગુનેગારો પર કડક ત્રાટકશે પોલીસ: પાસા (PASA) અને કોમ્બિંગના આદેશ
બેઠકમાં રાજ્ય પોલીસ વડાએ નીચે મુજબના કડક નિર્દેશો આપ્યા છે
- કડક કાર્યવાહી: લાંબા સમયથી ફરાર આરોપીઓ અને હિસ્ટ્રીશીટરો સામે તાત્કાલિક પગલાં લેવા તેમજ નોન-બેલેબલ વોરંટની બજવણી ઝડપી કરવી.
- પ્રતિબંધાત્મક પગલાં: મહત્તમ પાસા (PASA) હેઠળ ગુનેગારોને જેલભેગા કરવા અને સંવેદનશીલ વિસ્તારોમાં સઘન કોમ્બિંગ હાથ ધરવું.
- બોર્ડર ચેકિંગ: આંતરરાજ્ય સરહદો પર સઘન ચેકિંગ શરૂ કરી ગેરકાયદેસર હથિયારો અને દારૂની હેરાફેરી અટકાવવી.
વધારાનું પોલીસ બળ અને નવી વ્યૂહરચના - નવા રિક્રુટ્સની મદદ: સુરક્ષા વ્યવસ્થાને મજબૂત કરવા ૯૦૦૦ તાલીમબદ્ધ LRD રિક્રુટ્સ અને વન વિભાગના અધિકારીઓને ચૂંટણી ફરજમાં જોડવામાં આવશે.
- બદલી અને નિરીક્ષણ: જે અધિકારીઓની બદલી થઈ છે તેમને ૨૪ કલાકમાં નવી જગ્યાએ હાજર થઈ સંવેદનશીલ વિસ્તારોનું નિરીક્ષણ કરવા જણાવાયું છે.
- પેટ્રોલિંગમાં વધારો: ૧૫ એપ્રિલે ઉમેદવારોની આખરી યાદી જાહેર થયા બાદ રાજ્યભરમાં ફૂટ પેટ્રોલિંગ અને મોબાઇલ પેટ્રોલિંગ વધારી દેવામાં આવશે.
ચૂંટણી કાર્યક્રમ પર એક નજર - ૧૧ એપ્રિલ: ઉમેદવારી ફોર્મ ભરવાની છેલ્લી તારીખ.
- ૧૫ એપ્રિલ: ફોર્મ પરત ખેંચવાની અંતિમ તારીખ.
- ૨૩ એપ્રિલ: ઉમરેઠ વિધાનસભાની પેટાચૂંટણી.
- ૨૬ એપ્રિલ: મતદાન.
- ૨૮ એપ્રિલ: મતગણતરી.
દાહોદ જેવા સંવેદનશીલ વિસ્તારોમાં ૨૦૨૧ની ચૂંટણીના અનુભવોને આધારે વધારાનું પોલીસ બળ તૈનાત કરવામાં આવશે. ગાંધીનગર સ્થિત સ્ટેટ આઈબી (IB) ની ટીમો પણ સતત મોનિટરિંગ કરશે જેથી મતદારો કોઈપણ ભય વગર મતાધિકારનો ઉપયોગ કરી શકે.
