6 કિલો ગાંજા સાથે 4 આરોપી ઝડપાયા
ડાયમંડ સિટી Suratમાં નશીલા પદાર્થોના વધતા જાળને તોડવા માટે પોલીસ સતત એક્શન મોડમાં છે. “ડ્રગ્સ ફ્રી સુરત” અભિયાન હેઠળ Surat Policeએ વધુ એક મોટી સફળતા મેળવી છે. પુણા પોલીસ મથકની ટીમે બાતમીના આધારે ફિલ્મી ઢબે ઓપરેશન પાર પાડી 4 શખ્સોને ગાંજાના જથ્થા સાથે ઝડપી પાડ્યા છે.
મળતી માહિતી મુજબ, પોલીસને ચોક્કસ બાતમી મળી હતી કે Mahatma Gandhi Fruit Market પાસે કેટલાક શખ્સો નશીલા પદાર્થનું વેચાણ કરવા માટે ભેગા થયા છે. આ બાતમીને ગંભીરતાથી લઈને પોલીસે તાત્કાલિક ટીમો બનાવી સમગ્ર વિસ્તારમાં ગુપ્ત વોચ ગોઠવી હતી. પોલીસના જાળમાં ફસાયેલા ચારેય આરોપીઓ શંકાસ્પદ હાલતમાં ફરતા જોવા મળ્યા હતા. પોલીસે તેમને કસ્ટડીમાં લઈને તપાસ કરતાં અંદાજે 6 કિલો ગાંજો જપ્ત કર્યો હતો.
બજાર મૂલ્ય મુજબ આ ગાંજાની કિંમત આશરે ₹2.97 લાખ જેટલી થાય છે. આ ઉપરાંત આરોપીઓ પાસેથી મોબાઈલ ફોન, રોકડ રકમ અને એક બાઈક સહિત કુલ ₹3.89 લાખનો મુદ્દામાલ પણ જપ્ત કરવામાં આવ્યો છે. આ સમગ્ર કાર્યવાહી ખૂબ જ આયોજનબદ્ધ રીતે કરવામાં આવી હતી, જેને ફિલ્મી સ્ટાઈલનું ઓપરેશન કહી શકાય. પોલીસની ઝડપી અને ચોક્કસ કામગીરીને કારણે આરોપીઓને ભાગવાની કોઈ તક મળી નહોતી.
સુરત ની પુણા પોલીસે ચારેય આરોપીઓ વિરુદ્ધ NDPS Act હેઠળ ગુનો નોંધીને તેમની ધરપકડ કરી છે. હાલ આ ગાંજો ક્યાંથી લાવવામાં આવ્યો હતો અને સુરતમાં કોને પહોંચાડવાનો હતો તે દિશામાં પોલીસ વધુ તપાસ કરી રહી છે. આ કેસમાં વધુ લોકોના નામ ખુલવાની શક્યતા છે. સુરત પોલીસની આ કાર્યવાહીથી સ્પષ્ટ થાય છે કે શહેરમાં નશાના ગેરકાયદેસર ધંધા સામે કડક પગલાં લેવાઈ રહ્યા છે અને “ડ્રગ્સ ફ્રી સુરત” અભિયાનને વધુ મજબૂતી મળી રહી છે.
