મુંબઇ: અનંત અંબાણીના (Anant Ambani) 12 જુલાઇના રોજ લગ્ન થયા હતા. ત્યારે તેમના લગ્નમાં દેશ-વિદેશની અનેક પ્રખ્યાત હસ્તીઓએ હાજરી આપી હતી. તેમજ અનંત અંબાણીના લગ્નમાં (Marriage) અનેક પ્રકારની રસપ્રદ ઘટનાઓ પણ બની હતી. દરમિયાન અંબાણી પરિવારના શાહી લગ્નમાં હાજર રહેલા મહેમાનોને બનારસની સ્વાદિષ્ટ ચાટ પણ પીરસવામાં આવી હતી. જેની જવાબદારી નીતા અંબાણીએ જાતે જ બનારસના પ્રખ્યાત ‘કાશી ચાટ ભંડાર’ના માલિકને સોંપી હતી.
અગાઉ 27 જૂનના રોજ નીતા અંબાણી પોતાના પુત્ર અનંત અંબાણીના લગ્નનું કાર્ડ આપવા વારાણસીના કાશી વિશ્વનાથ મંદિર પહોંચી હતી. આ સમયગાળા દરમિયાન ભગવાન કાશી વિશ્વનાથ અને અન્ય ધાર્મિક સ્થળોની પૂજા સાથે, નીતા અંબાણીએ બનારસી સાડી પણ પહેરી હતી. આ ઉપરાંત તેમણે શહેરની સૌથી પ્રખ્યાત ચાટ શોપ ‘કાશી ચાટ ભંડાર’ની પણ મુલાકાત લીધી હતી અને ત્યાં ચાટની મજા માણી હતી.
નીતા અંબાણીને આ દુકાનની ચાટ એટલી પસંદ આવી કે તેમણે ‘કાશી ચાટ ભંડાર’ના માલિકને પોતાના પુત્ર અનંતના લગ્ન માટે પોતાની જગ્યાએ આવવાનું આમંત્રણ પણ આપ્યું. આમંત્રણની સાથે તેમણે લગ્નમાં મહેમાનો માટે ચાટ બનાવવાની જવાબદારી પણ ‘કાશી ચાટ ભંડાર’ના માલિકને સોંપી હતી. ત્યારે આમંત્રણ મળ્યા બાદ, ‘કાશી ચાટ ભંડાર’ના સંચાલક રાજેશ કેસરી અંબાણી પરિવારના લગ્ન સમારોહ માટે તેમની પ્રશિક્ષિત કારીગરોની ટીમ સાથે મુંબઈ પહોંચ્યા હતા. અહીં તેમણે બનારસની પ્રખ્યાત ટામેટા ચાટ, પનીર ચાટ, આલૂ ટિકિયા સહિત કુલ 7 પ્રકારની ચાટ તૈયાર કરી હતી. તેમજ માટીના કુલ્હડમાં મહેમાનોને આ ચાટ પીરસવામાં આવી હતી.
અંબાણીના મહેમાનોએ ચાખ્યો ‘કાશી ચાટ ભંડાર’નો સ્વાદ
અંબાણીના લગ્નમાં ‘કાશી ચાટ ભંડાર’ વિક્રેતાનો એક વીડિયો પણ સોશિયલ મીડિયા પર સામે આવ્યો હતો. આ વીડિયોમાં નીતા અંબાણી ‘કાશી ચાટ ભંડાર’ના ઓપરેટર રાજેશ કેસરી અને તેમની આખી ટીમનો અનંત અંબાણીના લગ્નમાં આવવા બદલ આભાર માનતા જોવા મળે છે. આ ઉપરાંત નીતા અંબાણી તેમના દ્વારા બનાવેલી ચાટનો પણ આનંદ લઈ રહ્યા છે. નીતા અંબાણીને વીડીયોમાં બનારસમાં ‘કાશી ચાટ ભંડાર’માં ચાટની મજા લેતા બતાવવામાં આવ્યા છે અને ત્યાર બાદ અનંત અંબાણીના લગ્નમાં ‘કાશી ચાટ ભંડાર’ ઓપરેટર રાજેશ કેસરી અને તેમની ટીમને પણ બતાવવામાં આવી છે. આ વીડિયો જોયા બાદ યુઝર્સનું કહેવું છે કે નીતા અંબાણીએ પોતાનું વચન પાળ્યું અને કાશી ચાટ ભંડાર વેચનારને પોતાના દિકરાના લગ્નમાં ભોલાવ્યા હતા.
![](https://gujaratmitra.in/wp-content/uploads/2022/04/gujaratmitraDOTin-Copy.png)