કેન્દ્ર સરકારે આવકવેરા કાયદો, 2025ને 1 એપ્રિલ, 2026થી અમલમાં મૂકવાનો નિર્ણય લીધો છે, જેના કારણે કરદાતાઓમાં ટેક્સ સ્લેબમાં ફેરફાર અંગે મૂંઝવણ ઉભી થઈ હતી. જોકે, સરકાર દ્વારા સ્પષ્ટ કરવામાં આવ્યું છે કે નવા કાયદા છતાં ટેક્સ સ્લેબમાં કોઈ ફેરફાર કરવામાં આવ્યો નથી અને હાલનું માળખું યથાવત્ રહેશે. નવી કર વ્યવસ્થાને હવે ડિફોલ્ટ તરીકે રાખવામાં આવી છે, એટલે કે જો કરદાતા કોઈ વિકલ્પ પસંદ નહીં કરે તો આપમેળે નવી સિસ્ટમ લાગુ થશે. તેમ છતાં, કરદાતાઓ પાસે જૂની કર વ્યવસ્થા પસંદ કરવાનો વિકલ્પ યથાવત્ રહેશે, ખાસ કરીને તેઓ માટે જેમની પાસે વ્યવસાયિક આવક નથી.
જૂની કર વ્યવસ્થા મુજબ 0થી 2.5 લાખ સુધીની આવક પર કોઈ ટેક્સ લાગુ નથી, જ્યારે 2.5 લાખથી 5 લાખ સુધી 5%, 5 લાખથી 10 લાખ સુધી 20% અને 10 લાખથી વધુ આવક પર 30% ટેક્સ લાગુ પડે છે. બીજી તરફ, નવી કર વ્યવસ્થા વધુ સ્લેબ સાથે રચાઈ છે, જેમાં 0થી 4 લાખ સુધી 0% અને ત્યારબાદ ધીમે ધીમે વધતા દરો સાથે 24 લાખથી ઉપર 30% સુધી ટેક્સ લાગુ થાય છે. નવી સિસ્ટમમાં કલમ 87A હેઠળ 12 લાખ સુધીની આવક પર ટેક્સ રાહત યથાવત્ રાખવામાં આવી છે, જેનાથી મોટાભાગના મધ્યમ વર્ગના કરદાતાઓને ફાયદો થઈ શકે છે. નાણામંત્રી નિર્મલા સીતારમને બજેટ 2026 દરમિયાન સ્પષ્ટ કર્યું હતું કે નવા કાયદાનો હેતુ ટેક્સ સિસ્ટમને સરળ બનાવવાનો છે, ન કે ટેક્સ દરોમાં ફેરફાર કરવાનો. તેથી નાણાકીય વર્ષ 2026-27 માટે ટેક્સપેયર્સને સ્લેબમાં કોઈ બદલાવ જોવા નહીં મળે. આથી સ્પષ્ટ થાય છે કે નવો કાયદો લાગુ થવા છતાં કરદાતાઓ માટે ટેક્સ દરોમાં કોઈ મોટો ફેરફાર નહીં થાય, પરંતુ સિસ્ટમ વધુ સરળ અને પારદર્શક બનશે.
