કેન્દ્ર સરકારના મહત્વાકાંક્ષી ગ્રેટ નિકોબાર મેગા ઇન્ફ્રાસ્ટ્રક્ચર પ્રોજેક્ટને મોટી રાહત મળી છે. મલાક્કા સ્ટ્રેટ નજીક આવેલું ગ્રેટ નિકોબાર ટાપુ વિશ્વના સૌથી વ્યસ્ત દરિયાઈ માર્ગોમાંનું એક છે. આ સ્થાન ભારતને આંતરરાષ્ટ્રીય સમુદ્રી વ્યવહારમાં મજબૂત સ્થિતિ આપશે. ICTT પ્રોજેક્ટનો હેતુ સિંગાપોર અને કોલંબો જેવા વિદેશી બંદરો પરની નિર્ભરતા ઘટાડવાનો છે. હાલમાં ભારત પાસે ઊંડા પાણીનું એવું બંદર નથી જ્યાં વિશાળ કાર્ગો જહાજો સરળતાથી લોડિંગ-અનલોડિંગ કરી શકે. આ પ્રોજેક્ટ પૂર્ણ થયા બાદ ભારતને વૈશ્વિક વેપારમાં સ્પર્ધાત્મક લાભ મળશે તેમજ દરિયાઈ સુરક્ષા અને આર્થિક વિકાસને પણ નવી દિશા મળશે. નેશનલ ગ્રીન ટ્રિબ્યુનલની છ સભ્યોની વિશેષ બેન્ચે પ્રોજેક્ટને આપવામાં આવેલી પર્યાવરણીય મંજૂરીને યથાવત્ રાખી છે. પ્રોજેક્ટના વિરોધ વચ્ચે ટ્રિબ્યુનલે જણાવ્યું કે પર્યાવરણ સુરક્ષા માટે જરૂરી તમામ શરતો અને સલામતીના પગલાં નક્કી કરવામાં આવ્યા છે. સુનાવણી દરમિયાન બેન્ચે પ્રોજેક્ટના વ્યૂહાત્મક મહત્વ પર ખાસ ભાર મૂક્યો હતો. એનજીટીના પ્રમુખ ન્યાયાધીશ પ્રકાશ શ્રીવાસ્તવે આદેશનો ટૂંકો ભાગ વાંચતા કહ્યું કે પર્યાવરણીય મંજૂરીમાં પૂરતી શરતો સામેલ છે અને અગાઉ પણ ટ્રિબ્યુનલ આ મામલે હસ્તક્ષેપ કરવાનો ઇનકાર કરી ચૂક્યું છે. હાઈ લેવલ સમિતિએ ઉઠાવાયેલા બાકીના મુદ્દાઓની વિગતવાર તપાસ કરી હતી.
બેન્ચે નોંધ્યું કે પ્રોજેક્ટ દેશ માટે આર્થિક અને સુરક્ષા દ્રષ્ટિએ મહત્વપૂર્ણ છે અને તેને અટકાવવા માટે કોઈ યોગ્ય કારણ જોવા મળતું નથી. સાથે જ સંબંધિત એજન્સીઓને તમામ શરતોનું કડક પાલન કરવાની સ્પષ્ટ સૂચના આપવામાં આવી છે. આ અંદાજે રૂ. 80,000 કરોડના ખર્ચવાળો પ્રોજેક્ટ Great Nicobar Island પર અમલમાં મૂકવામાં આવશે. તેમાં ઇન્ટરનેશનલ કન્ટેનર ટ્રાન્સશિપમેન્ટ ટર્મિનલ (ICTT), ગ્રીનફિલ્ડ ઇન્ટરનેશનલ એરપોર્ટ, ટાઉનશીપ અને ગેસ-સોલાર પાવર પ્લાન્ટનો સમાવેશ થાય છે. આ યોજના 2021માં NITI Aayog દ્વારા આગળ ધપાવવામાં આવી હતી.
