સુરત : સુરત (Surat) માટે મહત્વકાંક્ષી એવા 12 હજાર કરોડના મેટ્રો રેલ પ્રોજેકટ (Metro rail project)ની કામગીરી ધીમે ધીમે ગતિ પકડી રહી છે. સરથાણાથી ડ્રીમ સિટી (Dream city) સુધીના રૂટનું કામ ચાલુ થઇ ચૂક્યું છે. તેમાં પણ કાપોદ્રાથી મકકાઇપુલ સુધીના અંડર ગ્રાઉન્ડ રૂટ (Underground root) માટે સોઇલ ટેસ્ટિંગ અંતિમ તબક્કામાં છે.
અંડર ગ્રાઉન્ડ ખોદાણ માટે ટનલ બોરિંગ મશીન પણ સુરતમાં આવી ચૂક્યું છે અને અલગ અલગ ભાગમાં આવેલા આ મશીનને એસેમ્બલિંગ કરવાનું કામ ઝડપથી ચાલી રહ્યું છે ત્યારે હવે મેટ્રો રેલ કોર્પોરેશન માટે સૌથી મહત્વના એવા હેડકવાટર અને મેટ્રો રિલેટેડ તમામ ઓફિસો માટે મેટ્રો ભવન બનાવવા માટે મેટ્રો રેલ કોર્પોરેશન દ્વારા અલથાણ કેનાલ નજીકની જગ્યા પર પસંદગી ઉતારવામાં આવી છે. અલથાણ વિસ્તારમાં બનનારૂ આ મેટ્રો ભવન (metro bhavan) વિશાળ અને તમામ આધુનિક સુવિધાઓથી સજજ હશે.
મેટ્રો રેલના બે રૂટો સરથાણાથી ડ્રીમ સિટી અને સારોલીથી ભેંસાણ બંને માટે અલથાણ નજીક પડે તેમ છે. તેથી અલથાણ કેનાલ ખાતેની આ જમીન પર મેટ્રો ભવન બને તો તમામ કામગીરીનું સંચાલન સરળતાથી થઇ શકે તેવા આશયથી આ જમીન પસંદ કરવામાં આવી છે. સ્થાયી સમિતિની ગૂરૂવારે મળનારી મીટિંગમાં ભેંસાણમાં ડેપો અને કમ વર્કશોપ બનાવવા માટે ગુજરાત મેટ્રો રેલ કોર્પોરેશનને 165941 ચોરસ મીટર જમીન ફાળવવની દરખાસ્ત મુકવામાં આવી છે. ત્યારે હવે મેટ્રો રેલ માટે અલથાણ કેનાલ નજીક મેટ્રો ભવન માટે પણ 6500 ચોરસ મીટર જમીનની માંગણી મનપા સમક્ષ કરવામાં આવી હોય મેટ્રો ભવન માટે પણ જમીમ ફાળવવાની દરખાસ્ત ટૂંક સમયમાં આવે તેવી શકયતા છે.
‘મેટ્રો ભવન’ માટે આપવાની થતી જમીનની કિંમત ‘લેન્ડ વેલ્યુએશન કમિટી’ નકકી કરશે
સુરત મનપાની કોઇ પણ જમીન અન્ય કોઇ વિભાગ કે ત્રાહિત વ્યકિતને ફાળવવાની થાય ત્યારે તેની લીઝ તેમજ કિંમત, વનટાઇમ પ્રિમિયમ, વાર્ષિક ભાડું વિગેરે કલેકટર અને મ્યુનિ.કમિ. સહિતના અધિકારીઓની બનેલી કમિટી નકકી કરે છે. મેટ્રો ભવન માટે મનપાની જે સોનાની લગડી જેવી જમીન માંગવામાં આવી છે તે અલથાણ કેનાલની એકદમ નજીકની જમીન હોય, અહી બજાર કિંમત જે 60થી 65 હજાર પ્રતિ ચોરસ મીટર બોલાય છે. તે જોતાં અહી 6500 ચોરસ મીટર જમીન આશરે 35થી 40 કરોડની થાય છે.
જોકે સુરતના મહત્વકાંક્ષી પ્રોજેકટ માટે જમીન આપવાની થતી હોય તો સુરત મનપા માટે આ કિંમત મહત્વની રહેતી નથી. ત્યારે હવે શાસકો સમક્ષ આ દરખાસ્ત મુકાયા બાદ શુ નિર્ણય લેવાય છે તે જોવું રહ્યું.
