શહેરમાં ફરી એકવાર ભીષણ આગ લાગવાની ઘટના સામે આવી છે. આ વખતે સુરતની નામાંકિત કેમિકલ કંપનીમાં આગ લાગી છે. શહેરના સચિન હોજીવાલા કમ્પાઉન્ડમાં ભીષણ આગ લાગતા અફરાતફરીનો માહોલ છે. કેમિકલ કંપનીમાં આગ લાગી હોવાથી કેમિકલ ડ્રમમાં એક બાદ એક વિસ્ફોટ થઈ રહ્યા છે. પ્રાથમિક જાણકારી મુજબ, 30થી વધુ વિસ્ફોટ થઈ ચૂક્યા છે. ત્યારે ઘટનાની જાણ થતા જ સુરત ફાયર વિભાગ ઘટનાસ્થળે પહોંચ્યું છે અને ફાયર વિભાગના કર્મચારીઓએ પાણીનો મારો ચાલુ કર્યો છે. સુરતના સચિન હોજીવાલા કમ્પાઉન્ડમાં આવેલી એક નામાંકિત કેમિકલ કંપનીમાં આજે બપોરે અચાનક ભીષણ આગ ફાટી નીકળી હતી. કેમિકલના જથ્થાને કારણે આગે જોતજોતામાં વિકરાળ સ્વરૂપ ધારણ કરી લેતા સમગ્ર વિસ્તારમાં અફરાતફરીનો માહોલ સર્જાયો હતો. આ ઘટનાને પગલે આસપાસની અન્ય કંપનીઓમાં કામ કરતા શ્રમજીવીઓમાં પણ ભારે ફફડાટ ફેલાયો હતો.
આ ભયાનક આગમાં કંપનીમાં રાખેલા કેમિકલના ડ્રમ્સમાં એક પછી એક ધડાધડ વિસ્ફોટો થવા લાગ્યા હતા. પ્રાથમિક જાણકારી મુજબ, કેમિકલ રિએક્શન અને ગરમીને કારણે 30થી વધુ મોટા વિસ્ફોટો થયા હતા, જેના અવાજ કિલોમીટરો દૂર સુધી સંભળાયા હતા. આકાશમાં કાળા ડિબાંગ ધુમાડાના ગોટેગોટા ઉડતા જોવા મળ્યા હતા, જેના કારણે દૂરથી જ આ અકસ્માતની ભયાનકતાનો અંદાજ લગાવી શકાતો હતો.ઘટનાની જાણ થતા જ સુરત ફાયર વિભાગની 20થી વધુ ગાડીઓ તાત્કાલિક ઘટનાસ્થળે દોડી ગઈ હતી. ફાયર ફાઇટરોએ સતત પાણીનો મારો ચલાવીને આગ પર કાબૂ મેળવવાના પ્રયાસો હાથ ધર્યા છે. સદનસીબે, હજુ સુધી આ દુર્ઘટનામાં કોઈ જાનહાનિના સમાચાર પ્રાપ્ત થયા નથી, જે મોટી રાહતની વાત છે. હાલમાં ફાયર વિભાગ દ્વારા કુલિંગની કામગીરી ચાલુ રાખવામાં આવી છે જેથી આગ ફરી ન ફેલાય.
