ઉત્તર કોરિયાના નેતા Kim Jong Un એ જાહેરાત કરી છે કે દેશ હવે વધુ પરમાણુ હથિયારો વિકસાવવા અને સૈન્ય ક્ષમતાને વધુ મજબૂત બનાવવા પર ધ્યાન કેન્દ્રિત કરશે. ઉત્તર કોરિયાની સત્તારૂઢ વર્કર્સ પાર્ટીની નવમી કોંગ્રેસ પૂર્ણ થયા બાદ રાજધાની Pyongyang માં ભવ્ય સૈન્ય પરેડ યોજાઈ હતી, જેમાં દેશની સૈન્ય શક્તિનું પ્રદર્શન કરવામાં આવ્યું.
રાજ્ય સંચાલિત મીડિયા Korean Central News Agency (KCNA) મુજબ, કિમ જોંગ ઉને કહ્યું કે છેલ્લા વર્ષોમાં દેશની આંતરરાષ્ટ્રીય સ્થિતિમાં નોંધપાત્ર વધારો થયો છે અને આગામી પાંચ વર્ષ માટે મહત્વપૂર્ણ નીતિઓ નક્કી કરવામાં આવી છે. તેમણે ભારપૂર્વક જણાવ્યું કે પાર્ટીની મજબૂત ઈચ્છા છે કે દેશની પરમાણુ શક્તિને વધુ વિસ્તૃત અને મજબૂત બનાવવામાં આવે.કિમ જોંગ ઉનના જણાવ્યા અનુસાર, હવે પરમાણુ હથિયારોની સંખ્યા વધારવા, નવા પ્રકારના હુમલા સાધનો વિકસાવવા અને સૈન્યની કામગીરીને વધુ આધુનિક બનાવવા માટે મોટા પ્રોજેક્ટ હાથ ધરવામાં આવશે.
આંતરરાષ્ટ્રીય સંશોધન સંસ્થા Stockholm International Peace Research Institute (SIPRI) ના અંદાજ પ્રમાણે ઉત્તર કોરિયા પાસે હાલમાં આશરે 50 જેટલા પરમાણુ વોરહેડ્સ છે અને તે વધુ વોરહેડ્સ બનાવવા માટે જરૂરી સામગ્રી પણ તૈયાર કરી રહ્યું છે.અહેવાલ મુજબ ઉત્તર કોરિયા હવે વધુ શક્તિશાળી ઇન્ટરકન્ટિનેન્ટલ બેલિસ્ટિક મિસાઇલ (ICBM), પાણીની અંદરથી લોન્ચ થતી મિસાઇલ, આર્ટિફિશિયલ ઇન્ટેલિજન્સ આધારિત હુમલા સિસ્ટમ અને માનવરહિત ડ્રોન વિકસાવવાની યોજના પર કામ કરી રહ્યું છે. સૈન્ય પરેડ દરમિયાન હજારો સૈનિકોએ માર્ચપાસ્ટ કર્યો હતો અને આકાશમાં ફાઇટર જેટ્સે ફ્લાયપાસ્ટ પણ કર્યો હતો.
પરેડ દરમિયાન કિમ જોંગ ઉન પોતાની પુત્રી સાથે જોવા મળ્યા હતા, જેના કારણે ભવિષ્યમાં તેમને ઉત્તરાધિકારી તરીકે તૈયાર કરવામાં આવી રહી હોવાની અટકળો ફરી ચર્ચામાં આવી છે. સાથે સાથે કિમે અમેરિકા સાથેના સંબંધોને લઈને પણ સંકેત આપ્યો.તેમણે જણાવ્યું કે જો અમેરિકા ઉત્તર કોરિયા સામેની વિરોધી નીતિ છોડે તો બંને દેશો વચ્ચે સારા સંબંધો શક્ય છે. અમેરિકાના પૂર્વ પ્રમુખ Donald Trump સાથે કિમ અગાઉ ત્રણ વખત મુલાકાત કરી ચૂક્યા છે, પરંતુ હાલમાં કોઈ નવી વાતચીત આગળ વધે તેવી સ્પષ્ટતા સામે આવી નથી.વિશ્વ રાજકારણમાં આ નિવેદનને મહત્વપૂર્ણ માનવામાં આવી રહ્યું છે, કારણ કે તે એશિયા અને વૈશ્વિક સુરક્ષા પર સીધી અસર પાડી શકે છે.
