નવી દિલ્હી: કંગના રનૌત (Kangana Ranaut) પોતાની ફિલ્મ ‘ઇમરજન્સી’ને (Emergency) લઈને ફરી વિવાદમાં ઘેરાઇ ગઇ છે. ત્યારે ફરીદકોટના નીર્દલીય સાંસદ અને ઇન્દિરા ગાંધીની (Indira Gandhi) હત્યા કરનારા બોડિગાર્ડના દિકરા સરબજીત સિંહ ખાલસાએ ફિલ્મ વિરુદ્ધ વાંધો ઉઠાવ્યો હતો. ફિલ્મનો બહિષ્કાર કરતા સરબજીત સિંહે ફેસબુક પર એક લાંબી પોસ્ટ પણ લખી હતી, જેમાં તેમણે મોટા દાવાઓ કરી ફિલ્મને બેન કરવાની માંગ કરી હતી.
પોતાની પોસ્ટમાં સરબજીત સિંહે કહ્યું હતું કે ફિલ્મ ‘ઇમરજન્સી’ શીખ સમુદાયની ખોટી છાપ બનાવી રહી છે, જેના કારણે શીખ સમાજમાં પણ સમસ્યાઓ ઊભી થઈ શકે છે. સરબજીતે ફેસબુક પોસ્ટમાં આગળ લખ્યું કે, ‘એવા અહેવાલો સામે આવ્યા છે કે ફિલ્મ ઈમરજન્સીમાં શીખોને ખોટી રીતે દર્શાવવામાં આવી રહ્યા છે. જેના કારણે શીખ સમાજમાં કાયદો અને વ્યવસ્થા બગડે તેવી ભીતિ સેવાઈ રહી છે. જો આ ફિલ્મમાં શીખોને અલગતાવાદી અને આતંકવાદી તરીકે દર્શાવવામાં આવ્યા છે તો તે શીખ સમાજ વિરુદ્ધ એક ઊંડું કાવતરું છે. તેમજ આ ફિલ્મ વિદેશોમાં શીખો વિરુદ્ધ નફરત ફેલાવવા માટેનો માનસિક હુમલો છે, જેના પર સરકારે ધ્યાન આપવું જોઈએ અને આ ફિલ્મને બેન કરવી જોઈએ.’’
સરબજીત સિંહે પોતાની ફેસબુક પોસ્ટમાં આગળ લખ્યું હતુ કે, ‘દેશમાં શીખો પર નફરતના હુમલાના સમાચાર વારંવાર સામે આવે છે. આવી સ્થિતિમાં, આ ફિલ્મના કારણે શીખ સમુદાય વિરુદ્ધ સમાજમાં વધુ નફરત ભડકશે. શીખ સમુદાયે આ દેશ માટે મહાન બલિદાન આપ્યા છે, જે ફિલ્મોમાં સંપૂર્ણ રીતે દર્શાવવામાં આવ્યા નથી. પરંતુ શીખોને બદનામ કરવાનો દરેક પ્રયાસ અહીં કરવામાં આવ્યો હોય, જેથી સામુદાયિક સંવાદિતા અને કાયદાકીય વ્યવસ્થા જાળવવા માટે વાંધાજનક ફિલ્મો અને ગીતો પર પ્રતિબંધ મૂકવો જોઈએ. હું હંમેશા સમાજમાં શાંતિ જાળવવા માટે આવી અસામાજિક પ્રવૃત્તિઓ સામે અવાજ ઉઠાવીને આવી પ્રવૃત્તિઓને રોકવાનો પ્રયત્ન કરતો રહીશ.
કોણ છે સરબજીત સિંહ ખાલસા?
સરબજીત સિંહ ખાલસા બેઅંત સિંહના પુત્ર છે. અસલમાં ઓપરેશન બ્લુ સ્ટાર દરમિયાન 31 ઓક્ટોબર 1984ના રોજ તત્કાલિન વડાપ્રધાન ઈન્દિરા ગાંધીની ગોળી મારીને હત્યા કરનાર બે અંગરક્ષકોમાંના એક બેઅંત સિંહ હતા. હવે કંગના રનૌત જ્યારે પોતાની ફિલ્મ ‘ઇમરજન્સી’ લઇને આવી રહી છે. જેમાં બેઅંત સિંહની વાત કરવામાં આવી છે.
કંગનાની ફિલ્મ ઇમરજન્સીમાં 1975માં ઈન્દિરા ગાંધી દ્વારા ભારતમાં લાદવામાં આવેલી ઈમરજન્સીના સમયગાળાની વાતો સહિત ઈન્દિરાનો સંઘર્ષ અને તેમની હત્યા બતાવવામાં આવી છે. ત્યારે આ ફિલ્મમાં કંગના ઈન્દિરા ગાંધીનો રોલ કરી રહી છે. આ ફિલ્મમાં તેણી સાથે અનુપમ ખેર, શ્રેયસ તલપડે, મહિમા ચૌધરી, મિલિંદ સોમન, વિશાક નાયર જેવા સ્ટાર્સે કામ કર્યું છે. આ સાથે જ દિવંગત અભિનેતા સતીશ કૌશિક પણ આમાં મહત્વની ભૂમિકામાં છે.
