પશ્ચિમ એશિયામાં ચાલી રહેલા તણાવ વચ્ચે એક મોટો હુમલો સામે આવ્યો છે, જેમાં અમેરિકન અને ઇઝરાયેલી દળો દ્વારા કરવામાં આવેલા એર સ્ટ્રાઈકમાં ઈરાનનો મહત્વનો B1 બ્રિજ સંપૂર્ણપણે તબાહ થઈ ગયો હોવાનો દાવો કરવામાં આવ્યો છે. આ હુમલા બાદ Tehran અને કરજ વચ્ચેનો મુખ્ય માર્ગ સંપૂર્ણપણે બંધ થઈ ગયો છે, જેના કારણે બંને શહેરો વચ્ચેનો સીધો સંપર્ક તૂટી ગયો છે. આ હવાઈ હુમલામાં ઓછામાં ઓછા 2 લોકોના મોત થયાના અહેવાલ છે, જ્યારે અનેક લોકો ઘાયલ થયા છે. ઘાયલોને નજીકની હોસ્પિટલોમાં દાખલ કરવામાં આવ્યા છે. સદભાગ્યે, વીજળી, પાણી અથવા પર્યાવરણને લઈને કોઈ મોટા નુકસાનના અહેવાલ સામે આવ્યા નથી. જોકે, હુમલાની અસર એટલી ગંભીર હતી કે બ્રિજ સિવાય કરજ શહેરના કેટલાક વિસ્તારોમાં પણ નુકસાન નોંધાયું છે, જેના કારણે સ્થાનિક સ્તરે ભય અને અફરાતફરીનો માહોલ છે.
આ B1 બ્રિજ ઈરાનની એન્જિનિયરિંગ ક્ષમતાનો પ્રતીક માનવામાં આવતો હતો. આશરે 1,050 મીટર લાંબા આ પુલને 8 ભાગોમાં વહેંચવામાં આવ્યો હતો, જેમાં સૌથી લાંબો સ્પાન 176 મીટરનો હતો. તેને ટેકો આપવા માટે 136 મીટર ઊંચો પિલર બનાવવામાં આવ્યો હતો. આ પ્રોજેક્ટ પાછળ લગભગ 400 મિલિયન અમેરિકન ડોલરનો ખર્ચ થયો હતો, જે તેને પ્રદેશના સૌથી આધુનિક પુલોમાં સ્થાન આપતો હતો. આ વર્ષના શરૂઆતમાં જ આ પુલનું ઉદ્ઘાટન કરવામાં આવ્યું હતું. દાવો હતો કે આ બ્રિજ માત્ર Tehran અને Karajને ઝડપી રીતે જોડશે નહીં, પરંતુ આંતરરાષ્ટ્રીય વેપાર અને ટ્રાન્સપોર્ટને પણ નવી દિશા આપશે. પરંતુ આ હુમલાએ ઈરાનના આ મોટા ઈન્ફ્રાસ્ટ્રક્ચર સપનાને ભારે નુકસાન પહોંચાડ્યું છે. ઈરાનના વિદેશ મંત્રાલયના પ્રવક્તા ઇસ્માઇલ બાઘેઈએ આ હુમલાની નિંદા કરી છે.
