મિડલ ઈસ્ટમાં વધી રહેલા તણાવ વચ્ચે હવે યુદ્ધ એક એવા તબક્કે પહોંચી ગયું છે, જ્યાં સાથી દેશો વચ્ચેની વ્યૂહરચનામાં સ્પષ્ટ અંતર જોવા મળી રહ્યું છે. Donald Trump દ્વારા આપવામાં આવેલા સંકેતો સૂચવે છે કે અમેરિકા હવે આ સંઘર્ષમાંથી પીછેહઠ કરવા માટે તૈયાર છે, ભલે કોઈ રાજકીય સોદો થાય કે ન થાય. બીજી તરફ, Benjamin Netanyahuએ સ્પષ્ટ કર્યું છે કે ઇઝરાયલ ઇરાન સામેની લડાઈને અંત સુધી લઈ જશે અને તેની સૈન્ય કાર્યવાહી ચાલુ રાખશે.અમેરિકાના બદલાતા વલણ પાછળ અનેક કારણો છે. લાંબા સમયથી ચાલતા સંઘર્ષો, આર્થિક દબાણ અને આંતરિક રાજકારણ, બધું મળીને વોશિંગ્ટનને વધુ સાવચેત અભિગમ અપનાવવા પ્રેરિત કરી રહ્યા છે. ટ્રમ્પના નિવેદનથી સ્પષ્ટ થાય છે કે અમેરિકા હવે “નુકસાન નિયંત્રણ” અને વ્યૂહાત્મક રીતે બહાર નીકળવાની દિશામાં વિચાર કરી રહ્યું છે. ખાસ કરીને આવનારી ચૂંટણી અને વૈશ્વિક સ્તરે વધતી ટીકા વચ્ચે, યુએસ લાંબા સમય સુધી યુદ્ધમાં ફસાઈ રહેવા માંગતું નથી.
બીજી બાજુ, ઇઝરાયલ માટે આ માત્ર એક યુદ્ધ નથી, પરંતુ અસ્તિત્વ સાથે જોડાયેલો પ્રશ્ન છે. નેતન્યાહૂ સરકાર ઇરાનને તેના માટે સૌથી મોટો ખતરો માને છે અને તેના લશ્કરી માળખાને નબળું પાડવા માટે આક્રમક અભિગમ અપનાવી રહી છે. ઇઝરાયલની નીતિ સ્પષ્ટ છે, જ્યાં સુધી ઇરાનની શક્તિનો અંત નહીં આવે, ત્યાં સુધી હુમલાઓ ચાલુ રહેશે. આ વલણ રાજકીય રીતે પણ મહત્વપૂર્ણ છે, કારણ કે પીછેહઠને દેશમાં નબળાઈ તરીકે જોવામાં આવી શકે છે. આ બંને દેશોની વ્યૂહરચનાઓમાં તફાવત તેમના હિતો અને પ્રાથમિકતાઓને દર્શાવે છે. અમેરિકા વૈશ્વિક નેતૃત્વ અને આર્થિક સ્થિરતા વચ્ચે સંતુલન સાધવા માગે છે, જ્યારે ઇઝરાયલ પોતાની સુરક્ષા અને અસ્તિત્વને પ્રથમ સ્થાન આપે છે. ગલ્ફ દેશોનો ટેકો મર્યાદિત છે અને યુરોપિયન દેશો પહેલાથી જ યુદ્ધ વિરુદ્ધ છે, જેના કારણે ઇઝરાયલ માટે આંતરરાષ્ટ્રીય સ્તરે એકલતા વધવાની શક્યતા ઊભી થઈ રહી છે.
હાલની પરિસ્થિતિએ એક મહત્વપૂર્ણ પ્રશ્ન ઉભો કર્યો છે, શું ઇઝરાયલ આ યુદ્ધમાં એકલું પડી રહ્યું છે? જવાબ સંપૂર્ણપણે હા નથી, પરંતુ સંકેતો ચિંતાજનક છે. જો અમેરિકા સક્રિય સૈન્ય સહકારમાંથી પીછેહઠ કરે છે, તો ઇઝરાયલને વધુ જોખમો એકલા સહન કરવા પડી શકે છે.આગળ જોવામાં આવે તો, અમેરિકા તણાવ ઘટાડવા અને રાજનૈતિક ઉકેલ તરફ આગળ વધવાનો પ્રયાસ કરશે, જ્યારે ઇઝરાયલ તેની સૈન્ય કાર્યવાહી વધુ તેજ કરી શકે છે. ઈરાન પણ તેની પ્રતિક્રિયા ચાલુ રાખશે, જેનાથી સંઘર્ષ વધુ જટિલ બની શકે છે. સ્પષ્ટ છે કે યુએસ અને ઇઝરાયલ વચ્ચેનું વ્યૂહાત્મક અંતર હવે ખુલ્લું પડી રહ્યું છે. જો આ સ્થિતિ યથાવત રહે, તો મિડલ ઈસ્ટમાં સંઘર્ષ વધુ અનિશ્ચિત અને જોખમી બની શકે છે. હવે એ તો આવનારો સમય જ કહેશે કે અમેરિકા ખરેખર પીછેહઠ કરશે કે પછી દર વખતની જેમ ટ્રમ્પ આ વાતને પણ મજાક કહી ફગાવી દેશે.
