મિડલ ઈસ્ટમાં અમેરિકા-ઈઝરાયલ અને ઈરાન વચ્ચે વધતા યુદ્ધના તણાવની અસર ભારતીય શેરબજારમાં જોવા મળી રહી છે. આજે 9 માર્ચે બજારમાં ભારે વેચવાલી વચ્ચે સેન્સેક્સ લગભગ 2,300 પોઈન્ટ (2.80%) ઘટીને 76,500ના સ્તરે ટ્રેડ કરી રહ્યો છે. તે જ સમયે નિફ્ટી પણ લગભગ 700 પોઈન્ટ (2.80%) તૂટીને 23,750 આસપાસ વેપાર કરી રહ્યો છે. બજારમાં ખાસ કરીને બેન્કિંગ, ઓટો, મેટલ, એનર્જી અને FMCG સેક્ટરના શેરોમાં વધુ દબાણ જોવા મળી રહ્યું છે.
યુદ્ધની અસર વૈશ્વિક કોમોડિટી માર્કેટમાં પણ જોવા મળી રહી છે. શિકાગો મર્કેન્ટાઇલ એક્સચેન્જ પર ટ્રેડિંગ શરૂ થતાં જ બ્રેન્ટ ક્રૂડ 16.5% ઉછળી 108 ડોલર પ્રતિ બેરલ સુધી પહોંચી ગયું, જ્યારે શુક્રવારે તે 93 ડોલર પર બંધ થયું હતું. માત્ર 10 દિવસમાં જ ક્રૂડ ઓઈલના ભાવમાં લગભગ 48%નો વધારો નોંધાયો છે. જોકે ભારત સરકારે જણાવ્યું છે કે દેશમાં પૂરતું તેલ ઉપલબ્ધ હોવાથી પેટ્રોલ-ડીઝલના ભાવ પર તાત્કાલિક અસર નહીં થાય. આ દરમિયાન એશિયન બજારોમાં મિશ્ર વલણ જોવા મળ્યું હતું. સાઉથ કોરિયાનો કોસ્પી, જાપાનનો નિક્કેઈ, હોંગકોંગનો હેંગસેંગ અને ચીનનો શાંઘાઈ કમ્પોઝિટ ઇન્ડેક્સ વધારા સાથે કારોબાર કરતા જોવા મળ્યા હતા.
અમેરિકી બજારોમાં પણ 6 માર્ચે ઘટાડો નોંધાયો હતો. ડાઉ જોન્સ 453 પોઈન્ટ ઘટીને 47,501, જ્યારે નાસ્ડેક 1.59% ઘટીને 22,387 પર બંધ થયો હતો. સાથે જ S&P 500 ઇન્ડેક્સ 90 પોઈન્ટ ઘટીને 6,740 પર બંધ રહ્યો હતો. ગયા અઠવાડિયે પણ ભારતીય શેરબજારમાં દબાણ જોવા મળ્યું હતું. શુક્રવારે સેન્સેક્સ 1,097 પોઇન્ટ ઘટીને 78,919 પર બંધ થયો હતો, જ્યારે નિફ્ટી 315 પોઈન્ટ ઘટીને 24,450 પર આવી ગયો હતો.
