ગુજરાત સરકારે રાજ્યના પ્રવાસન અને ધાર્મિક સ્થળોના વિકાસ માટે મોટા પાયે ખર્ચ કરવા પ્રયોજન કર્યું છે. ગાંધીનગર ખાતે નાયબ મુખ્યમંત્રી હર્ષ સંઘવીએ મુખ્યમંત્રી ભૂપેન્દ્ર પટેલના માર્ગદર્શન હેઠળ કુલ 28.68 કરોડ રૂપિયાના વિવિધ પ્રકલ્પોને વહીવટી મંજૂરી આપી છે. આ રકમ દ્વારા ઐતિહાસિક કિલ્લાઓ, પ્રાચીન મંદિરો અને સ્વાતંત્ર્ય સંગ્રામ સાથે જોડાયેલા સ્થળોને આધુનિક સુવિધાઓથી સજ્જ કરવાનો ઉદ્દેશ છે. જૂનાગઢના ઐતિહાસિક ઉપરકોટ કિલ્લામાં પ્રવાસીઓની વધતી ભીડને ધ્યાનમાં રાખીને 1.07 કરોડ રૂપિયાનો પ્રથમ તબક્કાનો વિકાસ હાથ ધરાશે. તેમાં મજવેડી દરવાજા પાસે સુરક્ષા દિવાલ, પાર્કિંગ વ્યવસ્થા અને પ્રવાસી સુવિધા કેન્દ્રનો સમાવેશ થાય છે. ભવિષ્યમાં વડીલો અને દિવ્યાંગજનો માટે લિફ્ટની સુવિધા પણ ઉમેરાશે. સૌરાષ્ટ્રના હર્ષદ માતા મંદિર માટે સરકારે સૌથી વધુ 20.09 કરોડ રૂપિયાની ફાળવણી કરી છે. આ પગલાંથી યાત્રાધામના માળખાકીય વિકાસ અને સુવિધાઓમાં નોંધપાત્ર સુધારો થશે. મહેસાણાના શંખલપુર સ્થિત ટોડા બહુચરાજી માતાજી મંદિર ખાતે સોલાર સિસ્ટમ અને પેવર બ્લોક માટે 60.64 લાખ રૂપિયા મંજૂર થયા છે. અમરેલી જિલ્લાના બગસરા સ્થિત આઈ શ્રી ખોડિયાર મંદિરમાં સત્સંગ હોલ, પાર્કિંગ શેડ અને પાણીની સુવિધા માટે 49.80 લાખ રૂપિયાનો ખર્ચ થશે. વલસાડના ઘડોઈમાં આવેલા ઘાટકેશ્વર મહાદેવ મંદિર પરિસરને વિકસાવવા 1.80 કરોડ રૂપિયા ફાળવાયા છે, જેમાં નદીકાંઠે ઘાટ, બગીચાનું સુશોભન અને બાળકો માટે રમકડાં સાધનોનો સમાવેશ થાય છે.
આ ઉપરાંત, પંચમહાલના ગોધરામાં મહાત્મા ગાંધી દ્વારા 1917માં સ્થાપિત ઐતિહાસિક આશ્રમના જીર્ણોદ્ધાર માટે 3.36 કરોડ રૂપિયાની ગ્રાન્ટ ફાળવવામાં આવી છે. દક્ષિણ ગુજરાતની આદિવાસી સંસ્કૃતિના પ્રતિનિધિ કાર્યક્રમ ‘ડાંગ દરબાર 2026’ માટે 1.25 કરોડ રૂપિયાની નાણાકીય સહાય પણ જાહેર કરવામાં આવી છે. આ તમામ પ્રકલ્પોનો હેતુ રાજ્યના સાંસ્કૃતિક વારસાને મજબૂત બનાવવાનો, પ્રવાસીઓને વધુ સગવડો પૂરી પાડવાનો અને સ્થાનિક રોજગારી વધારવાનો છે.
