નવી દિલ્હી: એક મનપા આરોગ્ય અધિકારી(Health Officer)એ જણાવ્યું હતું કે, COVID-19ના વધારે ચેપી વેરિઅન્ટ XE નો પ્રથમ કેસ બુધવારે મુંબઈ(Mumbai)માં મળી આવ્યો હતો. XE ઓમિક્રોનનો સબ વેરિઅન્ટ છે અને તેના કરતા પણ વધારે ચેપી મનાય છે. બૃહન્મુંબઈ મ્યુનિસિપલ કોર્પોરેશન (BMC)ના અધિકારીઓએ જણાવ્યું હતું કે ફેબ્રુઆરીમાં દક્ષિણ આફ્રિકા(South Africa)થી આવેલી એક મહિલાને આ ઓમિક્રોન(Omicron) સબ-વેરિઅન્ટ હોવાનું જાણવા મળ્યું હતું. તેમણે ઉમેર્યું હતું કે તે એસિમ્પટમેટિક હતી અને ચેપમાંથી સ્વસ્થ થઈ હતી. પરંતુ દર્દીનો ડેટા, દક્ષિણ આફ્રિકાના રહેવાસી કે જેઓ ત્યારથી ચેપમાંથી સ્વસ્થ થયા છે, વધુ પુષ્ટિ માટે નેશનલ ઇન્સ્ટિટ્યૂટ ઑફ બાયોમેડિકલ જીનોમિક્સ (NIBGM) ને મોકલવામાં આવશે, એમ એક નાગરિક અધિકારીએ પછીથી જણાવ્યું હતું.
- મુંબઈમાં સાઉથ આફ્રિકાથી ફરેલી એક મહિલામાં XE વેરીઅન્ટ દેખાયો
- આ સબ વેરિઅન્ટ વધારે ચેપી મનાય છે, એક કેસ કપ્પા વેરિઅન્ટનો પણ મળ્યો
- પુષ્ટિ માટે ડેટા NIBGMને મોકલાશે
આ ઉપરાંત, સીરો સર્વેક્ષણ દરમિયાન કોરોનાવાયરસના કપ્પા વેરિઅન્ટનો કેસ પણ મળી આવ્યો હતો, BMC અધિકારીએ જણાવ્યું હતું કે, સ્થાનિક જીનોમ સિક્વન્સિંગ લેબમાં પરીક્ષણની 11મી બેચ, 376 નમૂનાઓના જીનોમ સિક્વન્સિંગમાં આ પરિણામો આવ્યા હતા. અગાઉ પણ શહેરમાં કપ્પાના કેસ મળી આવ્યા છે, એમ તેમણે ઉમેર્યું હતું. સીરો સર્વે મુજબ, મુંબઈમાંથી એકત્ર કરાયેલા 230 નમૂનાઓમાંથી 228 (99.13 ટકા)માં ઓમિક્રોન જોવા મળ્યો. એક કેસ XE નો હતો અને બીજો કપ્પાનો હતો.
સેમ્પલનું જીનોમ સિક્વન્સિંગ હાથ ધરવામાં આવ્યું
મ્યુનિસિપલ કસ્તુરબા હોસ્પિટલની જીનોમ સિક્વન્સિંગ લેબમાં 376 સેમ્પલનું જીનોમ સિક્વન્સિંગ હાથ ધરવામાં આવ્યું હતું. અધિકારીએ જણાવ્યું કે વાયરસના નવા સ્ટ્રેનથી સંક્રમિત થયેલા દર્દીઓની સ્થિતિ ગંભીર ન હતી. મુંબઈમાં મંગળવારે 56 કોવિડ-19 કેસ નોંધાયા હતા, જે એક દિવસ અગાઉ કરતાં ત્રણ ગણો વધારો છે, આ સાથે દેશની આર્થિક રાજધાનીમાં કેસની સંખ્યા 10,58,185 થઈ છે.
BMC અધિકારીએ જણાવ્યું હતું કે XE વેરિઅન્ટ Omicron ના BA.2 સબ-વેરિઅન્ટ કરતાં 10 ટકા વધુ ટ્રાન્સમિસિબલ લાગે છે. અત્યાર સુધી, BA.2 એ તમામ COVID-19 વેરિઅન્ટ્સ માં સૌથી વધુ ચેપી માનવામાં આવતો હતો. પ્રારંભિક અભ્યાસો મુજબ, XE વેરિઅન્ટનો BA.2 કરતા 9.8 ટકાનો વૃદ્ધિ દર છે, જે ટેસ્ટને થાપ આપવાની તેની ક્ષમતાને કારણે સ્ટીલ્થ વેરિઅન્ટ તરીકે પણ ઓળખાય છે.
સાઉથ આફ્રિકાથી પાછા ફર્યાના ત્રણ અઠવાડિયા પછી કોરોના પૉઝિટિવ
BMCના એક્ઝિક્યુટિવ હેલ્થ ઓફિસર મંગળા ગોમારેએ પીટીઆઈને જણાવ્યું હતું કે જે મહિલાને XE વેરિઅન્ટનો ચેપ હોવાનું જાણવા મળ્યું હતું તે દક્ષિણ આફ્રિકાથી આવી હતી અને પહોંચ્યાના ત્રણ અઠવાડિયા પછી કોરોનાવાયરસ ટેસ્ટ પૉઝિટિવ આવ્યો હતો. આ મહિલા, જે કોસ્ચ્યુમ ડિઝાઇનર છે, તે એક ફિલ્મ શૂટિંગ ક્રૂની સભ્ય હતી. તે 10 ફેબ્રુઆરી, 2022ના રોજ દક્ષિણ આફ્રિકાથી આવી હતી.”તે પહેલા તેનો કોઈ પ્રવાસ ઇતિહાસ ન હતો. તેને COMIRNATY રસીના બંને ડોઝ સાથે રસી આપવામાં આવી હતી,” અધિકારીએ કહ્યું, ઉમેર્યું કે તે કોઈ સહ-રોગથી પીડાતી નથી.
ભારતમાં આગમન પર તેનો કોવિડ-19 માટે ટેસ્ટ નેગેટિવ આવ્યો, પરંતુ 2 માર્ચે, તે નિયમિત પરીક્ષણ દરમિયાન પૉઝિટિવ આવી. ત્યારપછીના ટેસ્ટમાં તેણનો ટેસ્ટ નેગેટિવ આવ્યો હતો. ભારતમાં શોધાયેલ XE વેરિઅન્ટનો તે પ્રથમ કેસ હતો કે કેમ તે અંગે, BMC અધિકારીઓએ કહ્યું કે તેઓ આની પુષ્ટિ કરી શક્યા નથી.
એ XEનો કેસ લાગતો નથી: સરકારની સ્પષ્ટતા
INSACOG નિષ્ણાતો મુંબઈ મનપા અધિકારીઓ દ્વારા એકદમ ચેપી XE સબવેરિઅન્ટ તરીકે નોંધાયેલા કોરોનાવાયરસ કેસનું જીનોમિક પૃથ્થકરણ હાથ ધરી રહ્યા છે, જોકે અત્યાર સુધીના વૈજ્ઞાનિક પુરાવાઓ એવું સૂચવતા નથી, સત્તાવાર સૂત્રોએ બુધવારે જણાવ્યું હતું.
જો કે, અધિકૃત સૂત્રોએ સ્પષ્ટતા કરી હતી કે, “હાલના પુરાવા હજુ સુધી સૂચવતા નથી કે તે XE વેરિઅન્ટનો કેસ છે.” “ભારતીય SARS-CoV-2 જેનોમિક્સ કન્સોર્ટિયમ (INSACOG) નિષ્ણાતોએ નમૂનાની FastQ ફાઈલોની તપાસ કરી અને અનુમાન લગાવ્યું છે કે મુંબઈની મહિલાને ચેપ લગાડનાર આ પ્રકારની જીનોમિક રચના XE વેરિઅન્ટની જીનોમિક રચના સાથે સુસંગત નથી,” એમ એક અધિકારીએ જણાવ્યું હતું.
