પશ્ચિમી અફ્રિકાના દેશ માલીમાંથી ચોંકાવનારી ઘટના સામે આવી છે, જ્યાં એક સિમેન્ટ ફેક્ટરી પર આતંકવાદી હુમલા બાદ ત્રણ ભારતીય નાગરિકોને અપહરણ કરવામાં આવ્યા છે. ભારતના વિદેશ મંત્રાલય (MEA)એ આ ઘટના પર ગંભીર ચિંતા વ્યક્ત કરી છે અને માલી સરકારને તાત્કાલિક પગલાં લેવા માટે કહ્યું છે જેથી ભારતીય નાગરિકો સલામત રીતે મુક્ત થઈ શકે.
માહિતી પ્રમાણે, તા.1 જુલાઈ 2025ના રોજ માલીના કાયેસ શહેર સ્થિત ડાયમંડ સિમેન્ટ ફેક્ટરી પર કેટલાક સશસ્ત્ર હુમલાખોરોએ હુમલો કર્યો હતો. આ હુમલાના દૌરાન ફેક્ટરીમાં કામ કરતા ત્રણ ભારતીય નાગરિકોને બળજબરીપૂર્વક એક અજાણ્યા સ્થળે લઈ જવામાં આવ્યા હતા. અત્યાર સુધી કોઈપણ આતંકી સંગઠને આ અપહરણની જવાબદારી સ્વીકારી નથી, જોકે JNIM (Jama’at Nusrat al-Islam wal-Muslimin) નામના અલ-કાયદા સાથે સંકળાયેલા આતંકી સંગઠને તે જ દિવસે માલીમાં થયેલા અન્ય અનેક હુમલાઓની જવાબદારી સ્વીકારી છે.
વિદેશ મંત્રાલયનું નિવેદન: વિદેશ મંત્રાલયે જારી કરેલા નિવેદનમાં જણાવ્યું છે કે, “માલીમાં રહેતા અમારા ત્રણ નાગરિકોના અપહરણની ઘટના ગંભીર છે અને ભારત સરકાર આ મામલાને ખૂબ જ ગંભીરતાથી લઈ રહી છે. બામાકોમાં સ્થિત ભારતીય સ્થાનિક અધિકારીઓ, પોલીસ વિભાગ અને ફેક્ટરીના મેનેજમેન્ટ સાથે સતત સંપર્કમાં છે.” મંત્રાલયે વધુમાં કહ્યું કે આ મુદ્દે ભારતમાં તેમના પરિવારજનો સાથે પણ સંપર્ક કરવામાં આવી રહ્યો છે અને તમામ દિશામાં પ્રયાસો ચાલુ છે જેથી શક્ય તેટલી વહેલી તકે આ અપહરણ થયેલા નાગરિકોને મુક્ત કરાવી શકાય.
માલી સરકાર પર દબાણ: ભારત સરકારે માલી સરકારને અપીલ કરી છે કે જે પણ સ્તરે જરૂર હોય ત્યાં તાત્કાલિક પગલાં લેવામાં આવે અને સુરક્ષાની ખાતરી આપે. MEA એ જણાવ્યું છે કે આ ઘટના માત્ર માનવાધિકારનો ભંગ નથી, પણ આંતરરાષ્ટ્રીય સ્તરે કામ કરતા ભારતીય નાગરિકોની સલામતી માટે મોટો પ્રશ્ન પણ ઉભો કરે છે.
માલીમાં વસવાટ કરતા ભારતીયો માટે ચેતવણી: વિદેશ મંત્રાલયે માલીમાં વસવાટ કરતા તમામ ભારતીય નાગરિકોને સતર્ક રહેવા માટે કહ્યું છે. તેમનાં નિવાસસ્થાન અને કાર્યસ્થળના સુરક્ષાકવચોની સમીક્ષા કરવા તેમજ કોઈપણ સંદિગ્ધ પ્રવૃત્તિ જોવામાં આવે તો તાત્કાલિક બામાકો સ્થિત ભારતીય એમ્બસીનો સંપર્ક કરવા માટે જણાવ્યું છે.એમ્બસીએ પણ માલીમાં રહેલા ભારતીયોને તમામ પ્રકારની મદદની ખાતરી આપી છે અને કહ્યું છે કે સેવાઓ અને સલાહ માટે 24×7 સપોર્ટ ઉપલબ્ધ રહેશે.
