નવી દિલ્હી: કર્ણાટકમાં હિજાબનો વિવાદ અટકવાનું નામ નથી લઈ રહ્યો. રાજ્યમાં આજથી 28 માર્ચથી 10માની બોર્ડની પરીક્ષાનો પ્રારંભ થયો છે. બોર્ડની પરીક્ષાઓ વચ્ચે પણ તનાવ અને ચર્ચાનો માહોલ છે. હાઈકોર્ટના આદેશ બાદ કોઈ પણ વિદ્યાર્થીને ધાર્મિક ઓળખવાળા કપડા પહેરીને શાળામાં આવવાની પરવાનગી આપવામાં આવી નથી. આવી સ્થિતિમાં, હુબલીના શાંતિનિકેતન પરીક્ષા કેન્દ્રમાં એક વિદ્યાર્થીનીને હિજાબ પહેરવાને કારણે પરીક્ષા આપવા દેવામાં આવી ન હતી અને તેને ઘરે પરત મોકલી દેવામાં આવી હતી.
- હુબલીમાં પરીક્ષા સેન્ટર પર હિજાબ પહેરીને પેપર આપવા પહોંચેલી વિદ્યાર્થીની પરત આવી
- હિજાબ પહેરવાને કારણે પરીક્ષામાં બેસવા દેવામાં ન આવી
- કોઈ પણ વિદ્યાર્થીને ધાર્મિક ઓળખવાળા કપડા પહેરવાની પરવાનગી નહી: હાઈકોર્ટ
પરીક્ષા કેન્દ્રમાં પ્રવેશ ન અપાયો
પરીક્ષાઓ પહેલા જ તમામ વિદ્યાર્થીઓને યુનિફોર્મની સૂચનાઓ વિશે માહિતગાર કરવામાં આવ્યા હતા, જેનું ચુસ્તપણે પાલન કરવું ફરજિયાત હતું. હુબલીના શાંતિનિકેતન ટેસ્ટ સેન્ટરમાં, ધોરણ 10નો એક વિદ્યાર્થી હિજાબ પહેરીને પરીક્ષા આપવા આવ્યો હતો, જેને પરીક્ષા કેન્દ્રમાં પ્રવેશ આપવામાં આવ્યો ન હતો. વિદ્યાર્થીએ હિજાબ ઉતારવાની ના પાડી દીધી અને આખરે પરીક્ષા આપ્યા વિના ઘરે પરત ફરવું પડ્યું.
8.7 લાખ વિદ્યાર્થીઓએ પરીક્ષા આપી
આજે 28 માર્ચથી રાજ્યમાં SSLC બોર્ડની પરીક્ષાઓ શરૂ થઈ છે જેમાં લગભગ 8.7 લાખ વિદ્યાર્થીઓ પરીક્ષા આપી રહ્યા છે. રાજ્યમાં 3,444 પરીક્ષા કેન્દ્રો પર પરીક્ષા લેવામાં આવી રહી છે. સમયસર પરીક્ષામાં બેસવા જતા વિદ્યાર્થીઓને યુનિફોર્મ સહિત અન્ય તમામ સૂચનાઓ જારી કરવામાં આવી છે. પરીક્ષામાં કોરોના માર્ગદર્શિકાનું પાલન કરવું ફરજિયાત છે. પરીક્ષા 11 એપ્રિલના રોજ સમાપ્ત થશે.
અગાઉ ઉપિનંગડીમાં પરીક્ષામાં થયો હતો વિવાદ
મેંગલુરુથી 50 કિમી દૂર ઉપિનંગડીમાં કર્ણાટક પરીક્ષા યોજાઈ હતી. આ પરીક્ષામાં કેટલીક મુસ્લિમ મહિલાઓ અહીં હિજાબ પહેરીને આવી હતી અને કોલેજે તેમને પરીક્ષામાં બેસવા દીધા ન હતા. આ કારણે કેમ્પસમાં તણાવ શરૂ થયો હતો અને લગભગ 250 લોકોએ અહીં વિરોધ કરવાનું શરૂ કર્યું હતું. પ્રદર્શન કરનારાઓમાં પુરૂષો પણ સામેલ હતા અને મહિલાઓને હિજાબ પહેરીને પરીક્ષામાં બેસવા દેવાની માગણી કરી રહ્યા હતા. આ વિસ્તારના મુસ્લિમ આગેવાનોએ પણ વિદ્યાર્થીઓને સમજાવવાનો પ્રયાસ કર્યો હોવાના અહેવાલ છે, પરંતુ ઘણા મુસ્લિમ વિદ્યાર્થીઓ પરીક્ષામાં હાજરી આપ્યા વિના પરત ફર્યા હતા.
