‘નફરતને અહીં કોઈ સ્થાન નથી’ : કેનેડામાં છેલ્લા કેટલાક સમયથી ચાલી રહેલા ભારત વિરોધી અને ખાલિસ્તાની ગતિવિધિઓ વચ્ચે તણાવ વધુ તેજ બન્યો છે. તાજેતરમાં કેટલાક કટ્ટરપંથી સંગઠનો દ્વારા કેનેડાના હિંદુ મંદિરોની બહાર ‘ખાલિસ્તાન ઝિંદાબાદ’ ના નારા સાથે રેલીઓ યોજવાની જાહેરાત કરવામાં આવી છે. આ ગંભીર પરિસ્થિતિને ધ્યાનમાં રાખીને કેનેડાની પોલીસે કડક વલણ અપનાવ્યું છે અને સ્પષ્ટ શબ્દોમાં ચેતવણી આપી છે કે હિંસા કે નફરત ફેલાવનારાઓ સામે સખત કાર્યવાહી કરવામાં આવશે.
પોલીસની કડક કાર્યવાહી અને નિવેદન : કેનેડિયન પોલીસ વિભાગે (ખાસ કરીને પીલ રિજનલ પોલીસ) સોશિયલ મીડિયા અને સત્તાવાર યાદી દ્વારા જણાવ્યું છે કે, “અમારા સમુદાયમાં નફરત માટે કોઈ સ્થાન નથી.” મંદિરોની સુરક્ષા વધારી દેવામાં આવી છે અને કોઈપણ પ્રકારની અશાંતિ રોકવા માટે વધારાનો પોલીસ કાફલો તૈનાત કરવામાં આવ્યો છે. પોલીસ અધિકારીઓએ ભારપૂર્વક જણાવ્યું છે કે શાંતિપૂર્ણ પ્રદર્શનનો અધિકાર છે, પરંતુ જો તે હિંસા અથવા ધાર્મિક સ્થળોને નિશાન બનાવવામાં પરિવર્તિત થશે, તો કાયદો કડક હાથે કામ લેશે.
મંદિરો અને શ્રદ્ધાળુઓમાં ચિંતા : કેનેડામાં રહેતા ભારતીય સમુદાય અને ખાસ કરીને હિંદુ સંગઠનોએ આ રેલીઓ સામે ભારે વિરોધ નોંધાવ્યો છે. ભક્તોમાં ભયનો માહોલ છે કે પવિત્ર સ્થળો પર ખાલિસ્તાની સમર્થકો દ્વારા હંગામો મચાવવામાં આવી શકે છે. અગાઉ પણ બ્રેમ્પટન અને અન્ય શહેરોમાં મંદિરો પર હુમલા અને તોડફોડની ઘટનાઓ બની ચૂકી છે, જેના કારણે સ્થાનિક હિંદુ સમુદાય સુરક્ષાને લઈને ચિંતિત છે.
ભારત અને કેનેડા વચ્ચેના સંબંધોમાં ખટાશ : આ ઘટનાક્રમ એવા સમયે સામે આવ્યો છે જ્યારે ભારત અને કેનેડાના રાજદ્વારી સંબંધો અત્યંત ખરાબ તબક્કામાંથી પસાર થઈ રહ્યા છે. ભારત સરકારે કેનેડાને ખાલિસ્તાની આતંકવાદીઓ અને કટ્ટરપંથીઓને આશ્રય ન આપવા અને તેમની વિરુદ્ધ કાર્યવાહી કરવા વિનંતી કરી છે. ભારતે સ્પષ્ટ કર્યું છે કે કેનેડાની ધરતી પરથી ભારત વિરોધી એજન્ડા ચલાવવો એ સ્વીકાર્ય નથી.
કેનેડામાં રવિવાર અને સોમવારના રોજ યોજાનારી આ રેલીઓ પર સમગ્ર વિશ્વની નજર છે. કેનેડા સરકાર આ પરિસ્થિતિને કેવી રીતે સંભાળે છે તે તેના કાયદો અને વ્યવસ્થાના દાવાઓ પર મોટો પ્રશ્નચિહ્ન છે. હાલમાં શ્રદ્ધાળુઓને શાંતિ જાળવવા અને પોલીસના સંપર્કમાં રહેવા અપીલ કરવામાં આવી છે.
