મિડલ ઇસ્ટમાં ઈરાન-ઈઝરાયેલ અને અમેરિકા વચ્ચે વધતા તણાવની અસર હવે ગુજરાતના બજારો અને ઘરેલુ રસોડા સુધી પહોંચી ગઈ છે. યુદ્ધની પરિસ્થિતિ વચ્ચે ગેસ સપ્લાયમાં અછત, કાચા માલની અછત અને વધતી માંગના કારણે અનેક વસ્તુઓના ભાવમાં અચાનક વધારો જોવા મળી રહ્યો છે. ગેસ સિલિન્ડરથી લઈને મિનરલ વોટર, ઈલેક્ટ્રિક સગડી, ઇન્ડક્શન વાસણો, યાન અને ખાદ્યતેલ સુધી ઘણા ઉત્પાદનો મોંઘા થઈ ગયા છે. ગુજરાતમાં ઘરેલું ગેસ સિલિન્ડરની માંગ અચાનક વધી જતા ઘણા વિસ્તારોમાં અછત સર્જાઈ છે. ગેસ બુકિંગની ઓનલાઈન સુવિધા ઘણી જગ્યાએ બંધ થવાને કારણે લોકો સીધા ગેસ એજન્સીઓ પર પહોંચતા જોવા મળ્યા છે, જ્યાં લાંબી લાઇનો લાગી રહી છે. ગેસ સિલિન્ડરના ભાવમાં લગભગ 60 રૂપિયાનો વધારો થઈને કિંમત લગભગ 920 રૂપિયા સુધી પહોંચી ગઈ છે. વધુમાં, એક સાથે મોટા પ્રમાણમાં બુકિંગ થતાં મિસ કોલ અને વોટ્સએપ બુકિંગ સિસ્ટમ પણ ઘણી જગ્યાએ ક્રેશ થઈ ગઈ હોવાનું સામે આવ્યું છે.
યુદ્ધની અસર મિનરલ વોટર પર પણ પડી છે. પ્લાસ્ટિક બોટલ બનાવવા માટેનો કાચો માલ વિદેશમાંથી આવતા હોવાને કારણે સપ્લાય ચેઇન પર અસર પડી છે. તેના કારણે 20 લિટરની પાણીની બોટલનો ભાવ 115 રૂપિયાથી વધીને લગભગ 180 રૂપિયા સુધી પહોંચી ગયો છે અને આગળ વધુ વધારો થવાની શક્યતા વ્યક્ત કરવામાં આવી રહી છે. ગેસ સિલિન્ડરની અછતને કારણે ઘણા લોકો હવે ઈલેક્ટ્રિક સગડી અને ઇન્ડક્શન સ્ટોવ તરફ વળ્યા છે. વધતી માંગના કારણે ઈલેક્ટ્રિક સગડીના ભાવમાં લગભગ 15 ટકા સુધી વધારો થયો છે. અગાઉ જ્યાં એક મહિને 5-10 જેટલી સગડી વેચાતી હતી, ત્યાં હવે કેટલાક દુકાનોમાં રોજ એટલી માંગ જોવા મળી રહી છે. સાથે સાથે ઈન્ડક્શન પર વપરાતા વાસણોની માંગ પણ વધી છે અને તેના ભાવમાં પણ લગભગ 5 ટકા વધારો નોંધાયો છે.
ટેક્સટાઈલ ઉદ્યોગ પર પણ આ પરિસ્થિતિની અસર પડી છે. કેટલાક યાન ઉત્પાદકોએ યુદ્ધની આડમાં પ્રતિ કિલો 15 થી 20 રૂપિયાનો વધારો કરી દીધો છે. સુરતના ટેક્સટાઈલ ઉદ્યોગકારોએ આ વધારાને લઈને ચિંતા વ્યક્ત કરી છે અને કહ્યું છે કે આ વધારો કૃત્રિમ હોઈ શકે છે, જેનાથી કાપડ ઉત્પાદન પર અસર પડી શકે છે. ખાદ્યતેલના બજારમાં પણ વધારો નોંધાયો છે. રાજકોટમાં ખુલ્લા બજારમાં સિંગતેલમાં લગભગ 20 રૂપિયા, કપાસિયા તેલમાં 30 રૂપિયા અને પામતેલમાં 60 રૂપિયા સુધીનો વધારો જોવા મળ્યો છે. પામતેલનો ભાવ વધીને લગભગ 2360 રૂપિયા સુધી પહોંચી ગયો હોવાનું વેપારીઓ જણાવે છે.ઉદ્યોગ ક્ષેત્રમાં પણ અસર જોવા મળી રહી છે. મોરબીના પોલીપેક ઉદ્યોગમાં પ્લાસ્ટિક રો મટીરીયલ, જે અગાઉ 90-92 રૂપિયા પ્રતિ કિલો મળતું હતું, તે હવે 145-150 રૂપિયા સુધી પહોંચ્યું છે અને ઘણા વેપારીઓને બ્લેક માર્કેટમાં માલ મેળવવો પડી રહ્યો છે.
હોટલ અને રેસ્ટોરાં ઉદ્યોગ પર પણ આની અસર દેખાવા માંડી છે. અનેક હોટેલ્સ બંધ કરવાની નોબત આવી છે, તો કોઈ કોઈ હોટેલ અને રેસ્ટોરાંમાં મેનૂ પર કાવ મૂકાયો છે. તો વળી કોઈ જગ્યાએ તો એલપીજીના ઊંચા ચૂકવાયેલા દામ કસ્ટમર્સ પાસે બિલમાં વસૂલવામાં આવી રહ્યા હોવાની ઘટનાઓ સામે આવી છે. જોકે, પેટ્રોલ અને ડીઝલના ભાવ અંગે સોશિયલ મીડિયા પર ફેલાતી અફવાઓને લઈને ઓઈલ કંપનીઓએ સ્પષ્ટતા કરી છે કે હાલ દેશમાં ઈંધણના ભાવ વધારવાનો કોઈ નિર્ણય લેવામાં આવ્યો નથી.
