ગાંધીનગર: પૂર્વીય પવનની અસર હેઠળ રાજ્યમાં શીત લહેરની અસર જોવા મળી રહી છે. ખાસ કરીને કચ્છ અને અમરેલી શીત લહેર ચપેટમાં આવી ગયા છે. આજે રવિવારે કચ્છના નલિયામાં અને અમરેલીમાં 11 ડિગ્રી ઠંડી નોંધાવવા પામી છે. હવામાન વિભાગના વૈજ્ઞાનિકોના કહેવા મુજબ રાજ્યમાં ખાસ કરીને આગામી 72 કલાક સુધી ઠંડી વધશે. નલિયા- અમરેલી ઉપરાંત અમદાવાદ અને ગાંધીનગરમાં પણ ઠંડીનો ચમકારો જોવા મળી રહ્યો છે.
રાજયમાં આજે રવિવારે ઠંડીનો ચમકારો વધ્યો છે. સૌરાષ્ટ્ર અને કચ્છ, દક્ષિણ ગુજરાત અને ઉત્તર ગુજરાતમાં સામાન્ય કરતાં સાવ નીચું તાપમાન નોંધાવવા પામ્યું છે. કચ્છમાં ઠંડી વધતા જનજીવનને અસર થવા પામી છે. હવામાન વિભાગના વૈજ્ઞાનિકોના કહેવા મુજબ, રાજ્યમાં આગામી 72 કલાક દરમ્યાન 2થી 3 ડિગ્રી જેટલી ઠંડી વધશે. રાજ્યના વિવિધ શહેરોમાં ગરમીનો પારો સરેરાશ 30થી 32 ડિ.સે..ની આસપાસ રહ્યો હતો.
હવામાન વિભાગના સૂત્રોએ કહ્યું હતું કે રાજ્યના અન્ય શહેરો પૈકી ભૂજમાં 14 ડિ.સે.,નલિયામાં 11 ડિ.સે., કંડલા પોર્ટ પર 16 ડિ.સે., કંડલા એરપોર્ટ પર 14 ડિ.સે., અમરેલી ડિ.સે. 11 ડિ.સે., ભાવનગરમાં 15 ડિ.સે., રાજકોટમાં 13 ડિ.સે., સુરેન્દ્રનગરમાં 15 ડિ.સે., મહુવામાં 14 ડિ.સે., અમદાવાદમાં 15 ડિ.સે., ડીસામાં 14 ડિ.સે., ગાંધીનગરમાં 14 ડિ.સે., વલ્લભ વિદ્યાનગરમાં 15 ડિ.સે., વડોદરામાં 12 ડિ.સે., સુરતમાં 15 ડિ.સે. અને દમણમાં 14 ડિ.સે. લધુત્તમ તાપમાન નોંધાયું છે.
