સતત ચોથી વખત પોપ્યુલર ચોઈસ એવોર્ડ, ચાર વર્ષમાં કુલ પાંચ રાષ્ટ્રીય પુરસ્કારથી ગુજરાતે ઈતિહાસ રચ્યો
ગાંધીનગર,
77મા પ્રજાસત્તાક પર્વ નિમિત્તે નવી દિલ્હીના કર્તવ્ય પથ પર યોજાયેલી પરેડમાં રજૂ કરાયેલા ગુજરાત રાજ્યના ટેબ્લોએ સતત ચોથી વખત ‘પોપ્યુલર ચોઈસ કેટેગરી’માં પ્રથમ ક્રમ પ્રાપ્ત કરીને એક વધુ રાષ્ટ્રીય ગૌરવ હાંસલ કર્યું છે. આ સિદ્ધિ બદલ ગુજરાતને આજરોજ વિધિવત રીતે ટ્રોફી અને પુરસ્કાર એનાયત કરવામાં આવ્યો. હતો.નવી દિલ્હીના રાષ્ટ્રીય રંગશાળા શિબિર ખાતે યોજાયેલા પારિતોષિક વિતરણ સમારોહમાં કેન્દ્રિય રાજ્ય રક્ષામંત્રી સંજય સેઠના હસ્તે ટ્રોફી અને પ્રમાણપત્ર એનાયત કરવામાં આવ્યા હતા. ગુજરાત રાજ્ય વતી આ ટ્રોફી મુખ્યમંત્રીના અગ્ર સચિવ ડૉ. વિક્રાંત પાંડે અને માહિતી કમિશનર કિશોર બચાણી દ્વારા સ્વીકારવામાં આવી હતી.ટેબ્લો નિર્માણની પ્રક્રિયા દરમિયાન રાષ્ટ્રીય રંગશાળા ખાતે યોજાયેલી વિવિધ રાજ્યોના કલાકારોની સાંસ્કૃતિક નૃત્ય સ્પર્ધામાં ગુજરાતના નૃત્યને પ્રોત્સાહક ઈનામ પ્રાપ્ત થયું હતું, જે રાજ્યની લોકસાંસ્કૃતિક ધરોહરને મળેલી વિશેષ ઓળખ દર્શાવે છે.
અત્રે નોંધનીય છે કે, ચાલુ વર્ષનો ‘સ્વતંત્રતા કા મંત્રઃ વંદે માતરમ’ વિષય આધારિત ટેબ્લો ગુજરાત સરકારની માહિતી કમિશનર કચેરી દ્વારા નિર્માણ કરવામાં આવ્યો હતો.માહિતી કમિશનર કિશોર બચાણીના દિશાદર્શન અને અધિક માહિતી નિયામક અરવિંદ પટેલના માર્ગદર્શનમાં, સંયુક્ત માહિતી નિયામક ડૉ. સંજય કચોટ અને ફિલ્મ પ્રોડક્શન શાખાના નાયબ માહિતી નિયામક સુશ્રી ભાવના વસાવા દ્વારા ટેબ્લો નિર્માણની સમગ્ર પ્રક્રિયા સફળતાપૂર્વક હાથ ધરવામાં આવી હતી.
ગુજરાતના ટેબ્લોએ છેલ્લા ચાર વર્ષમાં રાષ્ટ્રીય સ્તરે ગૌરવપૂર્ણ સફળતા મેળવી છે. વર્ષ 2023માં પુનઃપ્રાપ્ય ઊર્જાના મહત્તમ ઉપયોગના સંદેશ સાથે રજૂ થયેલા ‘ક્લિન ગ્રીન એનર્જીયુક્ત ગુજરાત’ થીમ આધારિત ટેબ્લોએ ‘પોપ્યુલર ચોઈસ’ શ્રેણીમાં એવોર્ડ મેળવી વિજયયાત્રાની શરૂઆત કરી હતી.વર્ષ 2024માં ‘ધોરડો – વર્લ્ડ બેસ્ટ ટુરીઝમ વિલેજ’ થીમ પર આધારિત ટેબ્લોએ ‘પોપ્યુલર ચોઈસ’ શ્રેણીમાં પ્રથમ ક્રમ સાથે સાથે ટેબ્લોઝની શ્રેષ્ઠતા માટેની પસંદગી સમિતિની ‘જ્યુરીઝ્ ચોઈસ’ શ્રેણીમાં પણ બીજો ક્રમ પ્રાપ્ત કર્યો હતો.
ત્યારબાદ વર્ષ 2025માં પીએમ નરેન્દ્ર મોદીની પ્રેરણા અને માર્ગદર્શનમાં ગુજરાતે હાંસલ કરેલા આધુનિક વિકાસ અને પ્રાચીન વિરાસતના સંગમને રજૂ કરતો ‘આનર્તપુરથી એકતાનગર સુધી – વિરાસતથી વિકાસનો અદભૂત સંગમ’ થીમ આધારિત ટેબ્લો ‘પોપ્યુલર ચોઈસ એવોર્ડ’ જીત્યો હતો.આ પરંપરાને આગળ વધારતાં વર્ષ 2026માં પણ ગુજરાતે સતત ચોથી વખત ‘પોપ્યુલર ચોઈસ’ શ્રેણીમાં પ્રથમ ક્રમ મેળવીને ચાર વર્ષમાં કુલ પાંચ રાષ્ટ્રીય એવોર્ડ પ્રાપ્ત કરીને ઇતિહાસ સર્જ્યો છે.ગુજરાતના ટેબ્લોઝ દ્વારા દર વર્ષે રાજ્યની સમૃદ્ધ સાંસ્કૃતિક વિરાસત, વિકાસયાત્રા અને રાષ્ટ્રીય એકતાના સંદેશને સર્જનાત્મક રીતે રજૂ કરવામાં આવી રહ્યો છે, જેને રાષ્ટ્રીય સ્તરે જનતાનો અવિરત પ્રતિસાદ અને સ્વીકૃતિ મળી રહી છે.
