સુરતના બારડોલીમાં ચાલી રહેલી ‘ગુજરાત ટેનિસ ક્રિકેટ ટૂર્નામેન્ટ’ હાલમાં રમત કરતાં વધુ એક વિવાદને કારણે ચર્ચામાં આવી છે. સરદાર પટેલ ક્રિકેટ સ્ટેડિયમમાં રમાઈ રહેલી મેચ દરમિયાન એક યુવક જાહેરમાં બેસીને બિયર પીતો હોવાનો વીડિયો સોશિયલ મીડિયા પર વાયરલ થયો છે. આ ઘટનાએ પોલીસ અને ટૂર્નામેન્ટ આયોજકોની સુરક્ષા વ્યવસ્થા પર ગંભીર સવાલો ઉભા કર્યા છે. વાયરલ વીડિયોમાં સ્પષ્ટ રીતે જોવા મળે છે કે પ્રેક્ષક ગેલેરીમાં બેઠેલો એક યુવક બેફિકર રીતે બિયર પીતો હતો, જ્યારે મેચ ચાલુ હતી અને સ્ટેડિયમમાં અનેક લોકો હાજર હતા. વધુ ચોંકાવનારી વાત એ છે કે યુવકની નજીક જ બાઉન્સર ઉભો હોવા છતાં પણ કોઈએ તેને રોક્યો નહોતો. આથી એવું લાગી રહ્યું છે કે સુરક્ષા માત્ર નામમાત્રની જ હતી. સૂત્રો મુજબ વીડિયોમાં દેખાતો યુવક મેહુલ હસુ રાઠોડ છે, જે બારડોલીના એક જાણીતા બુટલેગરનો પુત્ર હોવાનું કહેવાય છે. આ કારણે સોશિયલ મીડિયામાં ચર્ચા થઈ રહી છે કે શું તેને કાયદાનો કોઈ ડર નથી? લોકો પ્રશ્ન ઉઠાવી રહ્યા છે કે ગુજરાતમાં દારૂબંધી હોવા છતાં સ્ટેડિયમ જેવી જાહેર જગ્યાએ બિયર કેવી રીતે પહોંચી? આ ઘટના બાદ લોકોમાં ભારે રોષ જોવા મળ્યો છે.
ઘણા લોકોએ આ ઘટનાને ગંભીર બેદરકારી ગણાવી છે અને આયોજકો સામે કડક કાર્યવાહી કરવાની માંગ કરી છે. લોકોનો સવાલ છે કે આટલી મોટી ટૂર્નામેન્ટમાં સુરક્ષા અને ચેકિંગ માટે શું વ્યવસ્થા કરવામાં આવી હતી? વીડિયો વાયરલ થતાં જ બારડોલી પોલીસ હરકતમાં આવી હતી. પોલીસે તરત જ કાર્યવાહી કરીને યુવકની અટકાયત કરી અને તેને મેડિકલ ચેકઅપ માટે સરકારી હોસ્પિટલમાં ખસેડ્યો. મેડિકલ રિપોર્ટમાં તે નશામાં હોવાનું બહાર આવતા પોલીસે તેની સામે ગુનો નોંધી આગળની કાર્યવાહી શરૂ કરી છે. માત્ર યુવક જ નહીં, પરંતુ પોલીસે ટૂર્નામેન્ટના આયોજકોને પણ પૂછપરછ માટે બોલાવ્યા છે. સ્ટેડિયમની અંદર બિયર જેવી વસ્તુ કેવી રીતે પહોંચી અને સુરક્ષામાં ક્યાં ખામી રહી તેની તપાસ કરવામાં આવશે. જો આયોજકોની બેદરકારી સાબિત થશે તો તેમની સામે પણ કડક પગલાં લેવામાં આવશે. આ ઘટના ફરી એકવાર બતાવે છે કે જાહેર કાર્યક્રમોમાં સુરક્ષા અને નિયમોનું પાલન કેટલી મહત્વપૂર્ણ છે. ખાસ કરીને ગુજરાત જેવા રાજ્યમાં, જ્યાં દારૂબંધી અમલમાં છે, ત્યાં આવી ઘટના ઘણા સવાલો ઉભા કરે છે.
