ગાંધીનગર: પૂર્વીય પવનની અસર હેઠળ ગુજરાતમાં શીત લહેરની અસર જોવા મળી રહી છે. કચ્છ હાલમાં શીત લહેરની ચપેટમાં આવી ગયું છે. છેલ્લા એક સપ્તાહથી કચ્છના નલિયામાં ઠંડીની અસર જોવા મળી રહી છે. આજે સોમવારે કચ્છના નલિયામાં 12.8 ડિ.સે. ઠંડી નોંધાઈ હતી.
હવામાન વિભાગના વૈજ્ઞાનિકોના કહેવા મુજબ રાજ્યમાં ખાસ કરીને આગામી 48 કલાક સુધી ઠંડી વધશે. નલિયા ઉપરાંત અમદાવાદ અને ગાંધીનગરમાં પણ ઠંડીનો ચમકારો જોવા મળી રહ્યો છે. રાજ્યમાં આજે સોમવારે ઠંડીનો ચમકારો વધ્યો છે. ઉત્તર ગુજરાત અને સૌરાષ્ટ્ર અને કચ્છમાં સામાન્ય કરતાં સાવ નીચું તાપમાન નોંધાયું હતું. કચ્છમાં ઠંડી વધતા જનજીવનને અસર થઈ છે.
હવામાન વિભાગના વૈજ્ઞાનિકોના કહેવા મુજબ, રાજ્યમાં આગામી 48 કલાક દરમ્યાન 2થી 3 ડિગ્રી જેટલી ઠંડી વધશે. રાજ્યના વિવિધ શહેરોમાં ગરમીનો પારો સરેરાશ 28થી 32 ડિ.સે..ની આસપાસ રહ્યો હતો. ભૂજમાં 14 ડિ.સે., નલિયામાં 13 ડિ.સે., કંડલા પોર્ટ પર 16 ડિ.સે., કંડલા એરપોર્ટ પર 14 ડિ.સે., અમરેલી ડિ.સે. 13 ડિ.સે., ભાવનગરમાં 15 ડિ.સે., રાજકોટમાં 13 ડિ.સે., સુરેન્દ્રનગરમાં 17 ડિ.સે., મહુવામાં 14 ડિ.સે., અમદાવાદમાં 16 ડિ.સે., ડીસામાં 15 ડિ.સે., ગાંધીનગરમાં 15 ડિ.સે., વલ્લભ વિદ્યાનગરમાં 16 ડિ.સે., વડોદરામાં 13 ડિ.સે. અને સુરતમાં 16 ડિ.સે. જ્યારે દમણમાં 16 ડિ.સે. લધુત્તમ તાપમાન નોંધાયું હતું.
