IPL 2026 શરૂ થવાના થોડા દિવસો પહેલા Rajasthan Royals અને Royal Challengers Bengaluru જેવી ટીમોના રેકોર્ડ મૂલ્યાંકનથી ક્રિકેટ જગતમાં ચર્ચા મચી છે. રાજસ્થાન રોયલ્સને અમેરિકન કન્સોર્ટિયમ દ્વારા લગભગ USD 1.63 બિલિયન (₹15,000 કરોડથી વધુ)માં વેચવામાં આવી હોવાનું સામે આવ્યું છે. પરંતુ આ મોટા સોદા કરતાં પણ વધુ ચર્ચા દિગ્ગજ Shane Warneના અનોખા રોકાણને લઈને થઈ રહી છે.
2008માં IPLની શરૂઆત વખતે વોર્ન ટીમમાં માત્ર ખેલાડી તરીકે જ નહીં, પરંતુ કેપ્ટન અને મેન્ટર તરીકે જોડાયા હતા. તેમને ટીમના ક્રિકેટિંગ નિર્ણયોમાં સંપૂર્ણ સ્વતંત્રતા આપવામાં આવી હતી, જે તે સમયે એક દુર્લભ બાબત હતી. જેના બદલે વોર્ને એક ખાસ ડીલ કરી હતી. રિપોર્ટ મુજબ, તેમને દર વર્ષે USD 657,000 સાથે 0.75% ઈક્વિટી આપવામાં આવી હતી. વોર્ને ચાર સીઝન સુધી ટીમ સાથે જોડાયેલા રહી કુલ 3% હિસ્સો મેળવ્યો હતો, જે આગળ જઈને સોનામાં ફેરવાયો.
વોર્ને પોતાની આગેવાનીમાં 2008માં જ રાજસ્થાન રોયલ્સને ચેમ્પિયન બનાવી દીધા હતા. આ જીત IPL ઈતિહાસની સૌથી યાદગાર અને અણધારી જીતોમાંની એક ગણાય છે. આ સાથે વોર્ને પોતાની લીડરશિપ અને દુરંદેશી બંને સાબિત કરી હતી.
2019માં ટીમનું મૂલ્યાંકન USD 400 મિલિયન હતું ત્યારે વોર્ને પોતાના હિસ્સા અંગે વિશ્વાસ વ્યક્ત કર્યો હતો કે તેની કિંમત ભવિષ્યમાં વધી જશે. આજે આ વાત હકીકતમાં બદલાઈ ગઈ છે.
હાલના મૂલ્યાંકન મુજબ, વોર્નનો 3% હિસ્સો હવે આશરે ₹450થી ₹460 કરોડ જેટલો થઈ ગયો છે. એક નાનકડા રોકાણમાંથી મળેલો આ વિશાળ નફો IPL ઈતિહાસના સૌથી સફળ દાવોમાંનો એક બની ગયો છે. આ સોદો હજી Board of Control for Cricket in Indiaની મંજૂરી હેઠળ છે અને 2026 સિઝન બાદ અમલમાં આવશે. 2022માં વોર્નના નિધન પછી પણ તેમનો આ નિર્ણય આજે તેમની લેગસી માટે ગૌરવરૂપ બની રહ્યો છે.
