ઉત્તરાખંડ: ઉત્તરાખંડના (Uttarakhand) રૂદ્રપુર સિદકુલ ઈન્ડસ્ટ્રીયલ એરિયામાં આવેલી બ્રિટાનિયા કંપનીની બિસ્કિટ (Biscuit) મેન્યુફેક્ચરિંગ ફેક્ટરીમાં ભીષણ આગ (Fire) ફાટી નીકળી હતી, જેના કારણે કંપનીને મોટું નુકસાન થયું હતું. ઉધમ સિંહ નગરના વરિષ્ઠ પોલીસ (Police) અધિક્ષક (એસએસપી) ટીસી મંજુનાથે જણાવ્યું હતું કે શનિવારે મધ્યરાત્રિ પછી લાગેલી આગને કાબૂમાં લેવા માટે ફાયર બ્રિગેડની 15-20 ગાડીઓ મોકલવામાં આવી હતી.
હજારો ટન બિસ્કીટ બળીને રાખ
મળતી માહિતી મુજબ આગમાં કોઈ જાનહાનિ થઈ નથી. પોલીસ અધિકારીએ જણાવ્યું કે ઘટના સમયે ફેક્ટરીમાં કામ કરતા તમામ લોકોને પોલીસે સુરક્ષિત રીતે બહાર કાઢ્યા હતા. તેમણે કહ્યું કે કંપનીના બિસ્કિટ ઉત્પાદન એકમના બે-ત્રણ એકરમાં બનેલા ગોડાઉનમાં રાખવામાં આવેલા હજારો ટન બિસ્કિટ બળીને રાખ થઈ ગયા છે. આ ઘટનામાં વેરહાઉસ પણ સંપૂર્ણપણે બળીને ખાખ થઈ ગયું હતું. ઘટનાની જાણ થતાં ફાયર બ્રિગેડ પહોંચી અને SIDCULની કંપનીની 15-20 ગાડીઓએ 5 કલાકની જહેમત બાદ આગ પર કાબૂ મેળવ્યો હતો.
હાજર અધિકારીઓ અને કર્મચારીઓમાં દોડધામ મચી ગઈ
શનિવારે રાત્રે સિડકુલની બ્રિટાનિયા ફેક્ટરીમાં અચાનક આગ લાગી હતી. આગ જોઈને કંપનીમાં હાજર અધિકારીઓ અને કર્મચારીઓમાં દોડધામ મચી ગઈ હતી. તેણે આ અંગે ફાયર વિભાગને જાણ કરી હતી. માહિતી મળતાં એડીએમ ડૉક્ટર લલિત નારાયણ મિશ્રા, એસપી મનોજ કાત્યાલ, એસડીએમ પ્રત્યુષ સિંહ, તહસીલદાર નીતુ ડાગર, ચીફ ફાયર ઓફિસર વંશ બહાદુર યાદવ, ફાયર સ્ટેશન ઓફિસર સિદકુલ ઈશામ સિંહ ટીમ સાથે પહોંચ્યા હતાં.
15-20 ફાયર બ્રિગેડની વાહનોએ આગ પર કાબુ મેળવ્યો હતો
ફાયર બ્રિગેડની ગાડીઓએ આગ ઓલવવાનું શરૂ કર્યું હતું. લગભગ 4 થી 5 કલાકની જહેમત બાદ 15-20 ફાયર ફાઈટરોએ આગ પર કાબુ મેળવ્યો હતો. એસપી સિટી મનોજ કાત્યાલે જણાવ્યું કે આગના કારણની તપાસ કરવામાં આવી રહી છે. કંપનીના અધિકારીઓ આગના કારણે થયેલા નુકસાનનું મૂલ્યાંકન કરી રહ્યા છે. તેમજ આગનું કારણ જાણી શકાયું નથી.
