સુરત જિલ્લામાં શુક્રવારની સવાર હૃદય કંપાવી દે તેવી સાબિત થઈ. NH-48 પર પલસાણા તાલુકાના બલેશ્વર પાટિયા નજીક એક ભયાનક અકસ્માતે બે પરિવારોમાં શોકની લાગણી ફેલાવી દીધી. સામાન્ય રીતે વાહનોની અવરજવરથી ગુંજતો આ હાઈવે આજે ચીસો અને અફરાતફરીનો સાક્ષી બન્યો હતો.મળતી માહિતી મુજબ, રિક્ષામાં સવાર મુસાફરો પોતાના કામે જઈ રહ્યા હતા, ત્યારે અચાનક જ ઝડપભેર આવી રહેલા અજાણ્યા વાહને જોરદાર ટક્કર મારી હતી. ટક્કર એટલી ભીષણ હતી કે રિક્ષા ફંગોળાઈને રસ્તા પર ઊંધી વળી ગઈ અને તેનો કચ્ચરઘાણ નીકળી ગયો.ઘટના સ્થળે હાજર લોકો થોડા સમય માટે સ્તબ્ધ બની ગયા હતા.આ દુર્ઘટનામાં બે મહિલાઓના ઘટના સ્થળે જ કમકમાટી ભર્યા મોત નિપજ્યા છે
અકસ્માતનો ઘા એટલો ગંભીર હતો કે તેમને બચાવવાનો કોઈ અવકાશ રહ્યો નહીં. જ્યારે રિક્ષામાં સવાર અન્ય બે વ્યક્તિઓ ઈજાગ્રસ્ત થયા, જેમને તાત્કાલિક 108 એમ્બ્યુલન્સ મારફતે નજીકની હોસ્પિટલમાં ખસેડવામાં આવ્યા. જેમને તપાસી ડોક્ટરોએ જણાવ્યું હતું કે એક વ્યક્તિને સામાન્ય ઈજા છે, જ્યારે બીજાની સારવાર ચાલુ છે. આ સાથે જ અકસ્માત સર્જ્યા બાદ અજાણ્યો વાહનચાલક પોતાનું વાહન લઈને સ્થળ પરથી ફરાર થઈ ગયો હતો ,આ હિટ એન્ડ રન ઘટનાએ સ્થાનિકોમાં રોષ અને ભયનું માહોલ ઊભું કર્યું છે. અકસ્માતની જાણ થતાં જ Palsana Police તાત્કાલિક ઘટનાસ્થળે પહોંચી અને સ્થિતિ કાબૂમાં લીધી. હાલ તો પોલીસે બંને મૃતક મહિલાઓના શવને કબજે કરી પોસ્ટમોર્ટમ માટે મોકલી આપ્યા છે
અકસ્માત ને પગલે હાઈવે પર ભારે ટ્રાફિક જામ સર્જાયો હતો. પોલીસ અને સ્થાનિક લોકોના સહકારથી વાહનવ્યવહાર ધીમે ધીમે પૂર્વવત કરવામાં આવ્યો. હાલમાં પોલીસે અજાણ્યા વાહનચાલકની શોધખોળ શરૂ કરી છે અને આસપાસના CCTV ફૂટેજની તપાસ હાથ ધરવામાં આવી છે.આ દુર્ઘટના ફરી એકવાર હાઈવે પર વધતી બેદરકારી અને ઝડપના ખતરાને ઉજાગર કરે છે. થોડા ક્ષણોની ઉતાવળે બે જીવ કાયમ માટે ચૂપ કરી દીધા. હવે પ્રશ્ન એ છે કે શું જવાબદાર ડ્રાઈવર કાયદાની પકડમાં આવશે? અને શું આવી ઘટનાઓ અટકાવવા માટે કડક પગલાં લેવામાં આવશે ?
