મિડલ ઈસ્ટમાં ચાલી રહેલા તણાવ અને યુદ્ધ જેવી સ્થિતિ વચ્ચે ભારત માટે રાહતભર્યા સમાચાર સામે આવ્યા છે. એલપીજી (LPG) ભરેલા બે મોટા જહાજો સફળતાપૂર્વક હોર્મુઝ સ્ટ્રેટ પાર કરીને હવે ભારત તરફ આગળ વધી રહ્યા છે, જે દેશના ઊર્જા પુરવઠા માટે મહત્વપૂર્ણ માનવામાં આવી રહ્યા છે. ‘જગ વસંત’ અને ‘પાઈન ગેસ’ નામના આ બંને LPG કેરિયર જહાજોમાં કુલ મળીને 92,612.59 મેટ્રિક ટન LPG ભરેલો છે, જે ભારતની ગેસ સપ્લાય ચેઇનને મજબૂત બનાવવામાં મદદરૂપ થશે. આ બંને જહાજોએ વિશ્વના સૌથી વ્યસ્ત અને સંવેદનશીલ દરિયાઈ માર્ગોમાંના એક એવા Strait of Hormuz ને સફળતાપૂર્વક પાર કર્યો છે. હાલના સમયમાં મિડલ ઈસ્ટમાં વધતા તણાવને ધ્યાનમાં લેતા આ માર્ગ પરથી પસાર થવું પડકારજનક માનવામાં આવે છે. તેમ છતાં, બંને જહાજો સુરક્ષિત રીતે આગળ વધી રહ્યા છે અને 26થી 28 માર્ચ દરમિયાન ભારત પહોંચવાની શક્યતા વ્યક્ત કરવામાં આવી છે.
આ જહાજોની સમયસર આવક ભારત માટે ખાસ મહત્વ ધરાવે છે, કારણ કે તાજેતરમાં વૈશ્વિક પરિસ્થિતિને કારણે LPG સપ્લાય અંગે ચિંતાઓ ઊભી થઈ હતી. આ જહાજો પહોંચ્યા બાદ દેશના વિવિધ વિસ્તારોમાં ગેસ સપ્લાય વધુ સ્થિર બનશે અને અછતનો ભય ઘટશે. ઊર્જા ક્ષેત્રના નિષ્ણાતો મુજબ, આવા સંજોગોમાં દરેક સપ્લાય શિપમેન્ટનું મહત્વ વધી જાય છે અને તે દેશની ઊર્જા સુરક્ષા માટે મહત્વપૂર્ણ કડી સાબિત થાય છે. ખાસ નોંધનીય વાત એ છે કે આ બંને જહાજોમાં કુલ 60 ભારતીય નાવિકો સવાર છે. જેમાં ‘જગ વસંત’ પર 33 અને ‘પાઈન ગેસ’ પર 27 નાવિકો પોતાની ફરજ બજાવી રહ્યા છે. હાલમાં તમામ નાવિકો સંપૂર્ણપણે સુરક્ષિત હોવાનું જાણવા મળ્યું છે, જે તેમના પરિવારજનો માટે મોટી રાહતની વાત છે. મિડલ ઈસ્ટના તણાવપૂર્ણ માહોલ વચ્ચે તેમની સલામત યાત્રા ભારત માટે ગૌરવ અને વિશ્વાસની બાબત બની છે.
તો બીજી તરફ સાઉદી અરેબિયાથી ભારત તરફ ક્રૂડ ઓઇલ સપ્લાય જાળવવા માટે મહત્વપૂર્ણ પગલું લેવામાં આવ્યું છે. યાન્બુ બંદરથી ‘એમટી કલિસ્ટા’ નામનું પનામા ફ્લેગવાળું ટેન્કર 24 માર્ચે એટલે કે આજે જેદ્દાહ મારફતે ભારતના પારાદીપ બંદર તરફ રવાના થયું છે. આ જહાજમાં ભરાયેલું ક્રૂડ ઓઇલ ભારતની ઊર્જા જરૂરિયાતોને પહોંચી વળવામાં મહત્વપૂર્ણ સાબિત થવાનું છે. આ જહાજનો માર્ગ એડન ખાડી જેવા સંવેદનશીલ દરિયાઈ વિસ્તારમાંથી પસાર થતો હોવાથી તેની સુરક્ષા માટે વિશેષ વ્યવસ્થા કરવામાં આવી છે. Indian Navy દ્વારા આ ટેન્કરને એડન ખાડી વિસ્તારમાં 24 કલાક સતત સુરક્ષા પૂરી પાડવામાં આવશે, જેથી કોઈપણ પ્રકારના જોખમને ટાળી શકાય અને જહાજની યાત્રા સુરક્ષિત રીતે પૂર્ણ થાય. ભારત સરકાર ઊર્જા પુરવઠાની સુરક્ષા મુદ્દે ખૂબ જ સજાગ બની છે. આ સ્થિતિની ગંભીરતા ધ્યાનમાં રાખીને નૌસેના પ્રમુખ Admiral Dinesh Tripathi એ પોતાની ઓસ્ટ્રેલિયા અને ન્યુઝીલેન્ડની નિર્ધારિત મુલાકાત પણ રદ કરી દીધી છે, જેથી આ સંવેદનશીલ પરિસ્થિતિને પ્રાથમિકતા આપી શકાય. સાથે જ નૌસેનાના અધિકારીઓ સતત જહાજના કેપ્ટન સાથે સંપર્કમાં છે અને દરિયાઈ માર્ગ પર કોઈપણ સંભવિત જોખમ સામે તૈયારી રાખી રહ્યા છે. આ સાથે જ નાવિકોના મનોબળને જાળવવા માટે પણ સતત સહયોગ આપવામાં આવી રહ્યો છે, જેથી સમગ્ર યાત્રા દરમિયાન સલામતી અને વિશ્વાસ બંને જળવાઈ રહે.
