નવી દિલ્હી: રાજ્યસભામાં (Rajya Sabha) આજે શુક્રવારે સમાજવાદી પાર્ટીના (Samajwadi Party) સાંસદ જયા બચ્ચન અને અધ્યક્ષ જગદીપ ધનખડ (Jagdeep Dhankhad) વચ્ચે જોરદાર બહેસ થઈ હતી. તેમજ બહેસ દરમિયાન અધ્યક્ષ ભારે નારાજ દેખાઇ રહ્યા હતા, તો બીજી બાજુ ચર્ચા પૂરી થયા બાદ જયા બચ્ચને (Jaya Bachchan) ગૃહની બહાર મીડિયા સાથે વાત કરી અને જગદીપ ધનખર પર ગંભીર આક્ષેપો કર્યા હતા.
અસલમાં જયા બચ્ચને આજે શુક્રવારે રાજ્યસભામાં જગદીપ ધનખરની બોલવાની રીત સામે વાંધો ઉઠાવ્યો હતો, અને તેમણે કહ્યું હતું કે તેણી એક અભિનેત્રી છે, એક કલાકાર છે, ટોન સમજે છે, બોડી લેંગ્વેજ સમજે છે, અને અધ્યક્ષનો ટોન તેમને યોગ્ય લાગ્યો નથી. ત્યારે જયા બચ્ચનની ટીપ્પણી ઉપર જગદીપ ધનખરે કહ્યું હતું કે અલબત્ત તમે ટોન સમજો છો, પરંતુ એક અભિનેતાએ ડિરેક્ટરની વાત સાંભળવી પડે છે. હું અહીં ડિરેક્ટર છું, તો મારી વાત સાંભળો, બેસો.
આ પહેલા પણ જયા બચ્ચનના રાજ્યસભામાં અધ્યક્ષ સાથે ઘર્ષણ થયા હતા. આ જ સત્રમાં જ્યારે ઉપાધ્યક્ષ હરિવંશ ગૃહનું સંચાલન કરી રહ્યા હતા, ત્યારે તેમણે જયા બચ્ચનને તેમના પૂરા નામ (જયા અમિતાભ બચ્ચન)થી સંબોધ્યા હતા. ત્યારે જયા બચ્ચને તેમની સામે વાંધો ઉઠાવ્યો હતો અને કહ્યું હતું કે આજના સમયમાં મહિલાઓને તેમના પતિના નામથી ઓળખવામાં આવે છે, જાણે સ્ત્રીની પોતાની કોઈ ઓળખ જ નથી. આસિવાય જયા બચ્ચને ઉપાધ્યક્ષને કહ્યું હતું કે તમે માત્ર જયા બચ્ચન કહ્યું હોત તો પણ તે પુરતુ જ હતું. મહિલાને પોતાના પતિના નામથી ઓળખવાનો આ નવો ટ્રેન્ડ શરૂ થયો છે.
જગદીપ ધનખરે બીજા દિવસે રાજ્યસભામાં જયા બચ્ચનના આ વાંધાનો જવાબ આપ્યો હતો. તેમણે કહ્યું હતું કે હરિવંશની છબી એક સરળ અને શાંત વ્યક્તિની છે જે નિયમોનું પાલન કરે છે. આ સાથે જ તેમણે કહ્યું હતું કે રેકોર્ડમાં જયાનું નામ જયા અમિતાભ બચ્ચન છે. આવી સ્થિતિમાં હરિવંશે કંઈ ખોટું કર્યું ન હતું. બીજી બાજુ શુક્રવારે જ્યારે જયાને બોલવાની તક મળી ત્યારે તેમણે પોતે જ પોતાનું નામ જયા અમિતાભ બચ્ચન કહી સંબોધન શરૂ કર્યું હતુું ત્યારે અધ્યક્ષ ધનખર પણ ખડખડાથ હસી પડ્યા હતા.
