ટ્રમ્પ-પુતિન મુલાકાતની તારીખ નક્કી, બંને નેતાઓ અલાસ્કામાં મળશે, યુક્રેનમાં શાંતિ અંગે ચર્ચા થશે
અમેરિકાના રાષ્ટ્રપતિ ડોનાલ્ડ ટ્રમ્પે જાહેરાત કરી છે કે તેઓ તા.15 ઓગસ્ટે અલાસ્કામાં રશિયાના રાષ્ટ્રપતિ વ્લાદિમીર પુતિન સાથે મળશે. આ મુલાકાતનો મુખ્ય ઉદ્દેશ યુક્રેનમાં ચાલી રહેલા યુદ્ધને અંત લાવવાના માર્ગો પર ચર્ચા કરવાનો રહેશે. ટ્રમ્પે આ માહિતી સોશિયલ મીડિયા પર પોસ્ટ કરીને આપી, અને કહ્યું હતું કે વધુ વિગતો પછીથી આપવામાં આવશે.
ટ્રમ્પે અગાઉ ઘણી વખત જણાવ્યું હતું કે તેઓ પુતિનને “ખૂબ જ ટૂંક સમયમાં” મળવા ઈચ્છે છે, કારણ કે યુક્રેનમાં લડાઈ રોકવા માટે પૂરતા પગલાં લેવામાં આવી રહ્યા નથી. આ મુલાકાતને સંભવિત રીતે મહત્વપૂર્ણ રાજકીય વિકાસ તરીકે જોવામાં આવી રહી છે.
વ્હાઇટ હાઉસમાં પત્રકારો સાથે વાત કરતી વખતે ટ્રમ્પે પુતિન સાથેની મુલાકાતની તારીખ અને સ્થળ જાહેર કરવાનું ટાળ્યું હતું, પરંતુ પછી અલાસ્કાનું નામ જાહેર કર્યું.
ટ્રમ્પે એવો પણ ઈશારો કર્યો કે તેમની પુતિન સાથેની મુલાકાત, યુક્રેનના રાષ્ટ્રપતિ વોલોડીમીર ઝેલેન્સકી સાથેની કોઈપણ મુલાકાત પહેલાં થઈ શકે છે. તેઓએ કહ્યું, “હું શક્ય તેટલું વહેલું મળવા માગું છું, પરંતુ સુરક્ષા વ્યવસ્થા પણ જરૂરી છે.”
અગાઉ ટ્રમ્પે અસંતોષ વ્યક્ત કર્યો હતો કે પુતિન સાથે મુલાકાત વહેલી થઈ શકી હોત, પરંતુ સુરક્ષા મુદ્દાઓને કારણે તે મુલતવી રાખવી પડી હતી.
આંતરરાષ્ટ્રીય રાજકીય માહોલમાં આ મુલાકાતનું મહત્વ વધુ છે, કારણ કે એ જ સમયે ટ્રમ્પે આર્મેનિયા અને અઝરબૈજાન વચ્ચે લાંબા સમયથી ચાલતા સંઘર્ષને સમાપ્ત કરવા માટે એક માળખાકીય કરારની જાહેરાત પણ કરી છે. આ પગલાંઓને કારણે ટ્રમ્પની વિદેશ નીતિની ભૂમિકા ફરી ચર્ચામાં આવી રહી છે.
તા.15 ઓગસ્ટની આ બેઠકમાં બંને નેતાઓ વચ્ચે યુક્રેન મુદ્દે શાંતિ સ્થાપવાના સંભાવિત ઉપાયો, તણાવ ઘટાડવાના માર્ગો અને આંતરરાષ્ટ્રીય સહકારના મુદ્દાઓ પર ચર્ચા થવાની અપેક્ષા છે.
