વૈશ્વિક બજારમાં ક્રૂડ ઓઈલના ભાવમાં અચાનક મોટો ઉછાળો આવ્યો છે, જેના પાછળનું મુખ્ય કારણ અમેરિકાના પ્રમુખ ડોનાલ્ડ ટ્રમ્પનું નિવેદન માનવામાં આવે છે. ટ્રમ્પે ઈરાનના મહત્વપૂર્ણ જળમાર્ગ સ્ટ્રેટ ઓફ હોર્મુઝ અને ઊર્જા સેન્ટરો પર કાર્યવાહી કરવાની ધમકી આપતા જ બજારમાં અનિશ્ચિતતા વધી ગઈ છે. આ ધમકી બાદ આંતરરાષ્ટ્રીય બજારમાં બ્રેન્ટ ક્રૂડનો ભાવ 110 ડોલર પ્રતિ બેરલને પાર પહોંચી ગયો છે, જ્યારે અમેરિકન WTI ક્રૂડ પણ 113 ડોલર આસપાસ ટ્રેડ થઈ રહ્યો છે. માત્ર એક દિવસમાં જ તેલના ભાવમાં 1–2% જેટલો વધારો નોંધાયો છે. નિષ્ણાતો માને છે કે જો હોર્મુઝનો માર્ગ લાંબા સમય સુધી બંધ રહેશે તો તેલના ભાવ હજુ વધુ વધી શકે છે.
હોર્મુઝનો જળમાર્ગ વિશ્વ માટે ખૂબ જ મહત્વપૂર્ણ છે, કારણ કે અહીંથી મોટી માત્રામાં તેલનો સપ્લાય થાય છે. જો અહીં અવરોધ આવે તો વૈશ્વિક સપ્લાય ચેઈન પર સીધી અસર પડે છે. હાલમાં યુદ્ધ જેવી સ્થિતિ અને રાજકીય તણાવને કારણે આ માર્ગ પર અનિશ્ચિતતા સર્જાઈ છે. આ પરિસ્થિતિનો સીધો અસર સામાન્ય લોકો પર પડી રહ્યો છે, ખાસ કરીને અમેરિકામાં. ત્યાં પેટ્રોલના ભાવ વધી ગયા છે. AAAના ડેટા મુજબ, અમેરિકામાં ગેસની સરેરાશ કિંમત 4.11 ડોલર પ્રતિ ગેલન સુધી પહોંચી ગઈ છે, જે 2022 પછીનું સૌથી ઊંચું સ્તર છે.
યુદ્ધ શરૂ થયા પછી ઈંધણના ભાવમાં લગભગ 38% નો વધારો થયો છે, જેના કારણે મોંઘવારીનો ભાર વધી રહ્યો છે. ટ્રમ્પે પહેલા 21 માર્ચ સુધીનો અલ્ટીમેટમ આપ્યો હતો, પરંતુ હવે તેને વધારીને 6 એપ્રિલ સુધી કર્યો છે. બીજી તરફ, ઓમાન જેવા દેશો સ્થિતિ શાંત કરવા માટે પ્રયાસ કરી રહ્યા છે. ઓમાનના વિદેશ મંત્રાલયે ઈરાન સાથે ચર્ચા કરીને જહાજોને સુરક્ષિત રીતે પસાર થવા દેવાની વાત કરી છે, જેથી સપ્લાય ચેઈન ચાલુ રહી શકે. પરંતુ ઈરાનનું વલણ કડક છે. ઈરાનના અધિકારીઓએ કહ્યું છે કે યુદ્ધમાં થયેલા નુકસાનની ભરપાઈ કર્યા વગર હોર્મુઝનો માર્ગ ફરીથી ખુલ્લો નહીં કરવામાં આવે. આ કારણે આગળના દિવસોમાં તેલના ભાવમાં વધુ વધારો થવાની શક્યતા વ્યક્ત કરવામાં આવી રહી છે.
