પાકિસ્તાને રાતોરાત પોતાના બંધારણમાં મોટો સુધારો કરીને એક નવું પદ “ચીફ ઓફ ડિફેન્સ ફોર્સીસ” બનાવ્યું છે. આ પદ પર દેશના હાલના આર્મી ચીફ અસીમ મુનીરને નિયુક્ત કરવામાં આવશે. આ નિર્ણય વડાપ્રધાન શાહબાઝ શરીફની સલાહ પર રાષ્ટ્રપતિ દ્વારા મંજૂર કરાયો છે.
પાકિસ્તાન સરકારે પોતાના બંધારણની કલમ 243માં સુધારો કરીને એક મહત્વપૂર્ણ પદની રચના કરી છે, જેને “ચીફ ઓફ ડિફેન્સ ફોર્સીસ” કહેવામાં આવ્યું છે. આ પદ હેઠળ ત્રણેય સશસ્ત્ર દળો સેના, નૌકાદળ અને વાયુસેના એક જ કમાન્ડ હેઠળ આવશે. સરકારનું કહેવું છે કે આ પગલું સૈન્ય વચ્ચે વધુ સંકલન અને કાર્યક્ષમતા લાવવા માટે લેવામાં આવ્યું છે.
આ સુધારા માટે સંસદમાં 27મો બંધારણીય સુધારો બિલ રજૂ કરવામાં આવ્યો હતો, જે ઝડપથી પસાર પણ થયો. આ બિલ મુજબ રાષ્ટ્રપતિ વડાપ્રધાનની સલાહ પર અસીમ મુનીરને આ નવા પદ પર નિયુક્ત કરશે.
અસીમ મુનીર કોણ છે?
અસીમ મુનીર હાલ પાકિસ્તાનના આર્મી ચીફ છે અને તાજેતરમાં જ તેમને ફિલ્ડ માર્શલના પદ પર બઢતી આપવામાં આવી છે, જે પાકિસ્તાની સૈન્યમાં બીજા ક્રમનો સર્વોચ્ચ હોદ્દો ગણાય છે. મુનીરે પાકિસ્તાનમાં સૈન્યની વ્યૂહાત્મક દિશામાં મહત્વપૂર્ણ ફેરફારો કર્યા છે અને હવે તેઓ ત્રિદળોની કમાન્ડ પણ સંભાળશે.
ઓપરેશન સિંદૂર બાદ લેવાયો મોટો નિર્ણય
પાકિસ્તાની મીડિયાના અહેવાલો અનુસાર, તાજેતરના “ઓપરેશન સિંદૂર” દરમિયાન ભારત સામે થયેલી હાર બાદ પાકિસ્તાને આ સુધારો કરવાનો નિર્ણય લીધો છે. એ અહેવાલો મુજબ, ઓપરેશન સિંદૂર દરમિયાન પાકિસ્તાની F-16 સહિતના અનેક લશ્કરી વિમાનોને ભારતે તોડી પાડ્યા હતા, જેના કારણે પાકિસ્તાને લડાઈ બંધ કરવાની વિનંતી કરવી પડી હતી.
આ ઘટનાએ પાકિસ્તાનની રક્ષણ વ્યવસ્થામાં ખામીઓ બહાર લાવી દીધી હતી. ત્યારથી સરકારે સૈન્યની એકતા અને સુમેળ વધારવા માટે એક જ કમાન્ડ સિસ્ટમ લાવવાનો નિર્ણય લીધો.
આ સુધારાથી પાકિસ્તાનની સૈન્ય રચનામાં મોટો ફેરફાર આવશે. અસીમ મુનીર હવે ત્રણેય સશસ્ત્ર દળોના સર્વોચ્ચ કમાન્ડર તરીકે દેશની રક્ષા નીતિમાં મુખ્ય ભૂમિકા ભજવશે.
