બિહાર: બિહારમાં (Bihar) ચાલી રહેલી રાજકીય ઉથલપાથલ વચ્ચે નીતિશ કુમારે (Nitish Kumar) જેડીયુ ધારાસભ્યોની બેઠકમાં કહ્યું હતું કે હવે ‘સાથે રહેવું મુશ્કેલ છે અને રાજીનામું આપવાનો સમય આવી ગયો છે.’
આજે એટલે કે 28મી જાન્યુઆરી બિહારની રાજનીતિ અને તેના મુખ્યમંત્રી નીતિશ કુમાર માટે ખૂબ જ મહત્વપૂર્ણ દિવસ બનવા જઈ રહ્યો છે. મુખ્યમંત્રી નીતિશ કુમારે મુખ્યમંત્રી પદ પરથી રાજીનામું આપી દીધું છે. નીતિશ કુમારે JDU ધારાસભ્ય દળની બેઠકમાં રાજીનામાની જાહેરાત કરી હતી. રિપોર્ટમાં જેડીયુના સૂત્રોના હવાલાથી કહેવામાં આવ્યું છે કે, બેઠકમાં નીતિશ કુમારે રાજીનામાની જાહેરાત કરી અને કહ્યું કે હવે સાથે રહેવું મુશ્કેલ છે અને રાજીનામું આપવાનો સમય આવી ગયો છે.
બેઠક બાદ નીતિશ કુમાર રાજીનામું આપવા માટે તરત જ રાજભવન જવા રવાના થઈ ગયા. ત્યાં તેમણે રાજ્યપાલ રાજેન્દ્ર આર્લેકરને પોતાનું રાજીનામું સુપરત કર્યું. હવે નીતિશ કુમાર એનડીએના સમર્થન સાથે નવી સરકાર બનાવવાનો દાવો રજૂ કરી શકે છે. અહેવાલો અનુસાર, ભાજપના ધારાસભ્યો થોડા સમય પછી મુખ્ય પ્રધાનના નિવાસસ્થાને જશે. જ્યાં NDA વિધાયક દળની બેઠકમાં નીતિશ કુમારને વિધાયક દળના નેતા તરીકે પસંદ કરવામાં આવશે. વિધાનસભ્ય દળની ચૂંટણી બાદ નીતિશ કુમાર એનડીએ નેતાઓ સાથે મળીને રાજ્યપાલને સરકાર બનાવવાનો દાવો રજૂ કરશે.
અગાઉ સમાચાર આવ્યા હતા કે નીતિશ કુમારને સમર્થન આપતા પહેલા ભાજપે નવો વળાંક આપ્યો છે. સૂત્રોના જણાવ્યા પ્રમાણે ભાજપે સમર્થન પત્ર આપતા પહેલા નીતિશ કુમારના રાજીનામાની માંગ કરી હતી. આ સાથે જ જેડીયુ કેમ્પે આ અંગે આશંકા વ્યક્ત કરી હતી. જેડીયુના સૂત્રોના જણાવ્યા અનુસાર સમર્થનનો પત્ર મળતા પહેલા મુખ્યમંત્રીએ રાજીનામું આપવું જોઈએ નહીં. જેડીયુના કેટલાક નેતાઓએ આશંકા વ્યક્ત કરી હતી કે ભાજપ તેમના વચનોથી પાછી ફરી શકે છે.
જેડીયુના નેતાઓ સાથે યોજાઈ બેઠક
આ સાથે જ નવી સરકારની રચનાને લઈને સીએમ હાઉસમાં નીતિશ કુમારની પોતાની પાર્ટી એટલે કે જેડીયુના સાંસદો અને ધારાસભ્યો સાથે બેઠક યોજાઈ હતી. અહેવાલો અનુસાર, આ બેઠકમાં જેડીયુના તમામ 45 ધારાસભ્યો અને 16 સાંસદો સીએમ હાઉસમાં હાજર હતા. આ સાથે જ ભાજપના નેતાઓ પણ પટના કાર્યાલય પહોંચવા લાગ્યા છે. સમગ્ર ઘટનાને લઈને બીજેપી સાંસદ ગિરિરાજ સિંહનું નિવેદન પણ સામે આવ્યું છે. ગિરિરાજ સિંહના કહેવા પ્રમાણે, ભાજપ તમામ મુદ્દાઓ પર નજર રાખી રહી છે. પક્ષ જ્યારે સમય આવશે ત્યારે આવો નિર્ણય લેશે.
