અમેરિકા અને ઇઝરાયેલના સંયુક્ત હવાઈ હુમલા બાદ ઈરાનમાં રાજકીય અને સુરક્ષાત્મક પરિસ્થિતિ અચાનક બદલી ગઈ છે. ઈરાનના સર્વોચ્ચ નેતા આયાતોલ્લાહ અલી ખામેનેઈના મોતની સત્તાવાર પુષ્ટિ થતાં દેશમાં શોક અને તણાવનો માહોલ છવાઈ ગયો છે. રવિવારે વહેલી સવારે ઈરાનના સ્ટેટ ટેલિવિઝને આ માહિતી જાહેર કરી, ત્યારબાદ દેશમાં 40 દિવસના રાષ્ટ્રીય શોકની જાહેરાત કરવામાં આવી છે અને સાત દિવસની રજા જાહેર કરાઈ છે.
ઈરાનના અનેક શહેરોમાં હજારો લોકો રસ્તા પર ઉતરી આવ્યા છે. સોશિયલ મીડિયા પર ફરતા વીડિયોમાં લોકો “અમેરિકા મુર્દાબાદ” અને “ઇઝરાયેલ મુર્દાબાદ” જેવા નારા લગાવતા જોવા મળ્યા છે. ઈરાકની રાજધાની બગદાદ તેમજ ભારતના કેટલાક વિસ્તારોમાં પણ શોકસભાઓ જોવા મળી રહી છે.
હુમલામાં ઈરાનના અન્ય બે મોટા નેતાઓના મોતની પણ પુષ્ટિ થઈ છે. ઇસ્લામિક રેવોલ્યુશનરી ગાર્ડ કોર્પ્સના કમાન્ડર જનરલ મહમ્મદ પાકપુર અને ખામેનેઈના નજીકના સલાહકાર અલી શમખાની પણ હુમલામાં માર્યા ગયા હોવાનું રાજ્ય મીડિયાએ જણાવ્યું છે. આ કારણે દેશના નેતૃત્વમાં ખાલી જગ્યા ઊભી થઈ છે.
આ પરિસ્થિતિમાં તાત્કાલિક નેતૃત્વ માટે એક કાઉન્સિલ બનાવવામાં આવી છે. તેમાં ઈરાનના રાષ્ટ્રપતિ, ન્યાયપાલિકાના વડા અને ગાર્ડિયન કાઉન્સિલના એક ધાર્મિક નિષ્ણાત સામેલ રહેશે. આ કાઉન્સિલ નવા સર્વોચ્ચ નેતા પસંદ થાય ત્યાં સુધી દેશના કામકાજ સંભાળશે.
બીજી તરફ, તેહરાનમાં લોકોની પ્રતિક્રિયા મિશ્ર જોવા મળી છે. કેટલીક જગ્યાએ લોકો ખુશી વ્યક્ત કરતા પણ જોવા મળ્યા હતા, જ્યાં લોકો સંગીત વગાડતા અને વાહનોના હોર્ન વગાડતા જોવા મળ્યા.
આ ઘટનાની વચ્ચે Donald Trumpએ જણાવ્યું કે અમેરિકા અને ઇઝરાયેલે ચોક્કસ નિશાનાઓ પર હુમલા ચાલુ રાખશે. તેના જવાબમાં ઈરાને મધ્યપૂર્વમાં અમેરિકી હિતોને નિશાન બનાવી પ્રતિકારાત્મક હુમલા શરૂ કર્યા હોવાનું જણાવાયું છે.
મિસાઇલ અને ડ્રોન હુમલાઓને કારણે સમગ્ર મધ્યપૂર્વમાં એલર્ટ જાહેર કરવામાં આવ્યું છે. સાઉદી અરેબિયા, બહેરિન, કુવૈત અને જોર્ડન સહિતના દેશોમાં વિસ્ફોટના અહેવાલો આવ્યા છે. અનેક દેશોએ સુરક્ષાને ધ્યાનમાં રાખીને પોતાનું હવાઈ ક્ષેત્ર પણ બંધ કરી દીધું છે.
હાલ સુધી ઈરાનમાં હુમલાઓમાં ઓછામાં ઓછા 201 લોકોના મોત અને 700થી વધુ લોકો ઘાયલ થયા હોવાનું અહેવાલ છે. તેમાં દક્ષિણ ઈરાનની એક છોકરીઓની સ્કૂલમાં થયેલા હુમલામાં 115 લોકોના મોત થયા હોવાની માહિતી પણ સામે આવી છે. પરિસ્થિતિને ધ્યાનમાં રાખીને વિશ્વભરમાં તણાવ વધતો જઈ રહ્યો છે.
