કેરળ વિધાનસભા ચૂંટણી પહેલા થ્રિસ્સુર જિલ્લામાં ગેરકાયદેસર રીતે ઘરગથ્થુ કિટ્સ વહેંચવાના મામલે મોટો ખુલાસો થયો છે. ચૂંટણી આયોગની ફ્લાઈંગ સ્ક્વોડ ટીમે આ ગતિવિધિ પકડી પાડતા પોલીસે કેસ નોંધ્યો છે અને વિગતવાર તપાસ શરૂ કરી છે.
માહિતી મુજબ, 4 એપ્રિલે થ્રિસ્સુર શહેરના ઓલારી પર્થસારથી મંદિર અને કાર્થિકા સુપર માર્કેટ નજીક આ ગેરકાયદેસર વહેંચણી કરવામાં આવી રહી હતી. ચૂંટણી આયોગની ટીમે દરોડા દરમિયાન આશરે 26 કિટ્સ જપ્ત કરી હતી, જેની કિંમત લગભગ ₹900 પ્રતિ કિટ હતી. આ કિટ્સમાં વિવિધ ઘરગથ્થુ સામાન સામેલ હતો. પ્રાથમિક તપાસમાં ખુલ્યું છે કે આ કિટ્સનું વિતરણ રાધાકૃષ્ણન નામના વ્યક્તિના નિર્દેશ પર કરવામાં આવી રહ્યું હતું. વધુમાં, અધિકારીઓએ જણાવ્યું કે ટીમ પહોંચે તે પહેલાં આશરે 75 જેટલી કિટ્સ પહેલેથી જ લોકોમાં વહેંચી દેવામાં આવી હતી.
આ ઘટના ખૂબ જ સંવેદનશીલ છે કારણ કે કેરળમાં 9 એપ્રિલે મતદાન થવાનું છે. ચૂંટણી પહેલા આ પ્રકારની ગેરકાયદેસર પ્રવૃત્તિઓને મતદારોને પ્રભાવિત કરવાનો પ્રયાસ માનવામાં આવે છે. ચૂંટણી આયોગે જણાવ્યું કે આ કૃત્ય ભારતના કાયદા મુજબ ગંભીર ગુનો છે. તેમાં ભારતીય ન્યાય સંહિતા (BNS)ની કલમ 170 અને 173 હેઠળ “ચૂંટણી લાંચ” સંબંધિત ગુનાઓ તથા પ્રતિનિધિત્વ કાયદા હેઠળ “ભ્રષ્ટ આચરણ”નો સમાવેશ થાય છે.
આ ગુનાઓ નોન-કોગ્નિઝેબલ હોવાને કારણે પોલીસએ પહેલા મેજિસ્ટ્રેટની મંજૂરી મેળવી અને ત્યારબાદ સત્તાવાર રીતે કેસ નોંધ્યો છે. હાલમાં થ્રિસ્સુર વેસ્ટ પોલીસ દ્વારા સમગ્ર મામલે વિગતવાર તપાસ હાથ ધરવામાં આવી રહી છે. ચૂંટણી પહેલાં આવી ઘટનાઓ સામે સખત કાર્યવાહી કરવાની સૂચના આપવામાં આવી છે. ચૂંટણી આયોગે સ્પષ્ટ કર્યું છે કે મતદારોને પ્રલોભન આપવાના કોઈપણ પ્રયાસને કડક રીતે રોકવામાં આવશે, જેથી નિષ્પક્ષ અને પારદર્શક ચૂંટણી પ્રક્રિયા સુનિશ્ચિત થઈ શકે.
