ગાઝિયાબાદના પૂર્વ બોક્સિંગ ચેમ્પિયન હરીશ રાણાની 13 વર્ષ લાંબી સંઘર્ષભરી જીવનયાત્રા આખરે 24 માર્ચે વહેલી સવારે 4:10 વાગ્યે પૂર્ણ થઈ. વર્ષો સુધી કોમામાં રહેલા હરીશે જીવન અને મરણ વચ્ચેની કઠિન લડાઈ લડી, પરંતુ અંતે તેમની પીડાનો અંત આવ્યો. આ ઘટના માત્ર એક પરિવાર માટે જ નહીં, પરંતુ સમગ્ર સમાજ માટે પણ ભાવુક અને વિચારપ્રેરક બની છે. બુધવારે આજે દિલ્હીના ગ્રીન પાર્ક સ્મશાનગૃહમાં હરીશ રાણાના અંતિમ સંસ્કાર સવારે 8:30 વાગ્યે કરવામાં આવ્યા. હતા તેમના પાર્થિવદેહને સ્મશાનગૃહ લાવવામાં આવ્યો હતો, જ્યાં પરિવારજનો અને નજીકના લોકો ભારે હૈયે હાજર રહ્યા હતા. અંતિમ વિધિ પહેલાં 10 મિનિટનું મૌન પાળવામાં આવ્યું, અને ત્યારબાદ નાના ભાઈ આશિષ રાણાએ આંસુભરી આંખોથી મુખાગ્નિ આપી. આ ક્ષણમાં પરિવારની લાગણીઓ શબ્દોમાં વર્ણવવી મુશ્કેલ હતી. માતા નિર્મલા દેવી શોકમાં તૂટી પડ્યા હતા, જ્યારે પિતા વિનોદ રાણાએ હાથ જોડીને સૌને વિનંતી કરી કે કોઈ રડશે નહીં અને તેમના દીકરાને શાંતિથી વિદાય આપે.
હરીશ રાણાનો કેસ માત્ર વ્યક્તિગત પીડાનો નહોતો, પરંતુ કાનૂની અને નૈતિક ચર્ચાઓ સાથે પણ જોડાયેલો હતો. લાંબા સમયથી ચાલી રહેલી સારવાર દરમિયાન AIIMSના ડોકટરો, સુપ્રીમ કોર્ટના વકીલો અને બ્રહ્માકુમારીઓએ પરિવારને સહારો આપ્યો. અંતે સુપ્રીમ કોર્ટના માર્ગદર્શન હેઠળ ડોકટરોની 10 સભ્યોની વિશેષ ટીમ બનાવવામાં આવી, જેના નિરીક્ષણમાં હરીશને ઈચ્છામૃત્યુ આપવામાં આવી. આ નિર્ણયે સમાજમાં માનવ અધિકાર, જીવનની ગુણવત્તા અને મરણના અધિકાર જેવા મુદ્દાઓ પર ચર્ચા તેજ કરી. સરકાર તરફથી પણ પરિવારને સહાય મળી. ઉત્તર પ્રદેશના મુખ્યમંત્રી યોગી આદિત્યનાથના નિર્દેશ હેઠળ અધિકારીઓએ અંતિમ સંસ્કાર પ્રક્રિયામાં સહયોગ આપ્યો. રાજકીય અને સામાજિક આગેવાનો પણ હરીશને શ્રદ્ધાંજલિ આપવા હાજર રહ્યા, જે તેમના પ્રભાવ અને સંવેદનશીલતાનું પ્રતિબિંબ હતું.
હરીશ રાણાએ પોતાના મૃત્યુ બાદ પણ માનવતાની ઊંડી છાપ છોડી. તેમના ફેફસાં, બંને કિડની અને કોર્નિયાનો દાન કરવામાં આવ્યો, જેના કારણે 6 લોકોને નવી જિંદગી મળી. એક તરફ પરિવાર માટે આ અપૂરણીય ક્ષતિ છે, પરંતુ બીજી તરફ તેમના આ નિર્ણયે અનેક પરિવારોમાં આશાનો દીવો પ્રગટાવ્યો છે. હરીશ રાણાની કહાની માત્ર એક દુઃખદ અંતની નથી, પરંતુ સંઘર્ષ, સહનશક્તિ, કાનૂની લડત અને અંતે માનવતાના મહાન કાર્યની પ્રેરણાદાયી ગાથા છે.
