તામિલનાડુ વિધાનસભા ચૂંટણીની ગરમાગરમી વચ્ચે ભાજપના કદાવર નેતા અને પૂર્વ IPS અધિકારી કે. અન્નામલાઈનું નામ ઉમેદવારોની યાદીમાં ન હોવાને કારણે રાજકીય ચર્ચાઓ તેજ બની છે. અનેક વર્તુળોમાં આ મુદ્દે સવાલો ઉઠી રહ્યા છે કે શું પાર્ટીએ અન્નામલાઈને સાઈડલાઈન કરી દીધા છે. જોકે, હવે ખુદ અન્નામલાઈએ આગળ આવીને આ તમામ અટકળોને નકારી કાઢી છે અને પાર્ટીના નિર્ણય પાછળનું કારણ સ્પષ્ટ કર્યું છે. અન્નામલાઈએ જણાવ્યું કે તેમને ચૂંટણી લડાવવાને બદલે પાર્ટીએ વધુ મોટી અને વ્યાપક જવાબદારી સોંપી છે. તેઓએ સ્પષ્ટ કર્યું કે આ કોઈ સાઈડલાઈન કરવાનો નિર્ણય નથી, પરંતુ એક વિચારીને બનાવવામાં આવેલી ચૂંટણી વ્યૂહરચનાનો ભાગ છે. ભાજપે તેમને સમગ્ર રાજ્યમાં પ્રચાર કરવાની મુખ્ય ભૂમિકા આપી છે.
તેમણે કહ્યું કે, હાલ તેમને પુડુચેરી અને કેરળમાં ચૂંટણી પ્રચારની જવાબદારી સોંપવામાં આવી છે, જે તેઓ 7 તારીખ સુધી સંભાળશે. ત્યારબાદ, 7 એપ્રિલથી 23 એપ્રિલ સુધી તેઓ સમગ્ર તામિલનાડુમાં પ્રવાસ કરીને ભાજપ અને NDAના તમામ ઉમેદવારો માટે પ્રચાર કરશે. અન્નામલાઈએ વિશ્વાસ વ્યક્ત કર્યો કે તેઓ આ જવાબદારીને સંપૂર્ણ નિષ્ઠા સાથે નિભાવશે અને પાર્ટીને જીત અપાવવા માટે પૂરજોશમાં કામ કરશે. રાજકીય વિશ્લેષકોના મતે, આ નિર્ણય પાછળ એક મોટું રાજકીય ગણિત હોઈ શકે છે. જો અન્નામલાઈ પોતે એક બેઠક પરથી ચૂંટણી લડ્યા હોત, તો તેમનું ધ્યાન માત્ર તે જ વિસ્તારમાં મર્યાદિત રહી જાત. જ્યારે હવે તેઓ સમગ્ર રાજ્યમાં પ્રચાર કરીને વધુ બેઠકો પર અસર પાડી શકે છે. તેમની લોકપ્રિયતા અને ‘ક્રાઉડ પુલર’ ઈમેજને ધ્યાનમાં રાખીને પાર્ટીએ તેમને એક બેઠક પર મર્યાદિત રાખવાને બદલે રાજ્યવ્યાપી જવાબદારી સોંપી છે.
જોકે, વિરોધ પક્ષો આ નિર્ણયને અલગ રીતે જોઈ રહ્યા છે. તેઓનો આરોપ છે કે ભાજપની અંદર ચાલી રહેલા મતભેદો અને આંતરિક ખેંચતાણને કારણે અન્નામલાઈને ચૂંટણીમાંથી દૂર રાખવામાં આવ્યા છે. આ દાવાઓને અન્નામલાઈએ સખત શબ્દોમાં નકારી કાઢ્યા છે. તેમણે સ્પષ્ટ કર્યું કે તેઓ કોઈ પણ રીતે બેકફૂટ પર નથી, પરંતુ ફ્રન્ટફૂટ પર આવીને NDAને જીતાડવા માટે મેદાનમાં ઉતર્યા છે. તેમના આ નિવેદનથી સ્પષ્ટ થાય છે કે ભાજપ તેમને રાજ્યવ્યાપી અભિયાનના ચહેરા તરીકે આગળ ધપાવી રહી છે. આ રીતે, અન્નામલાઈને ટિકિટ ન મળવાનો મુદ્દો હવે માત્ર ચર્ચાનો વિષય નથી રહ્યો, પરંતુ તે ભાજપની મોટી ચૂંટણી વ્યૂહરચનાનો મહત્વપૂર્ણ ભાગ બની ગયો છે.
