2024-25માં ₹308 કરોડનું દાન, કોંગ્રેસ અને AAP બહુ પાછળ
ગુજરાતમાં વર્ષ 2024-25 દરમિયાન રાજકીય પક્ષોને મળેલા ચુંટણી દાનના આંકડાઓએ રાજ્યની રાજકીય પરિસ્થિતિનું સ્પષ્ટ ચિત્ર રજૂ કર્યું છે. તાજા આંકડા મુજબ ભારતીય જનતા પાર્ટી (ભાજપ)ને આ સમયગાળા દરમિયાન અંદાજે ₹308 કરોડનું દાન મળ્યું છે, જ્યારે કોંગ્રેસ અને આમ આદમી પાર્ટી (AAP)ને તેની સરખામણીએ ખૂબ જ ઓછી રકમ પ્રાપ્ત થઈ છે.
મળતી માહિતી અનુસાર કોંગ્રેસને આશરે ₹69.60 લાખ અને AAPને ₹10.10 લાખનું દાન મળ્યું છે. આ આંકડા દર્શાવે છે કે ગુજરાતમાં રાજકીય ફંડિંગમાં ભાજપનો ભારે દબદબો યથાવત રહ્યો છે. કુલ મળીને રાજ્યમાં રાજકીય પક્ષોને મળેલા દાનમાં ભાજપનો હિસ્સો લગભગ સમગ્ર ફંડ જેટલો છે.
વિશ્લેષકોનું માનવું છે કે આ પ્રકારનું એકતરફી ફંડિંગ આવનારી રાજકીય સ્પર્ધા અને ચૂંટણીની તૈયારી પર સીધી અસર કરી શકે છે. મોટા પ્રમાણમાં મળતું દાન પાર્ટીની ચૂંટણી વ્યૂહરચના, પ્રચાર અભિયાન, સંગઠન મજબૂત બનાવવું અને ડિજિટલ કેમ્પેઇન માટે મહત્વપૂર્ણ સાબિત થાય છે.
માહિતી મુજબ મોટાભાગનું દાન કોર્પોરેટ હાઉસ, ઉદ્યોગ જૂથો અને ખાનગી કંપનીઓ તરફથી મળ્યું છે. ખાસ કરીને ઈન્ફ્રાસ્ટ્રક્ચર, રિયલ એસ્ટેટ અને મેન્યુફેક્ચરિંગ સેક્ટરની કંપનીઓ દ્વારા મોટા યોગદાન આપવામાં આવ્યા હોવાનું માનવામાં આવે છે. થોડા મોટા દાતાઓએ જ કુલ દાનના મોટા હિસ્સામાં ફાળો આપ્યો હોવાનું પણ સામે આવ્યું છે.
રાજકીય નિરીક્ષકોના મતે આ આંકડા માત્ર દાનની રકમ નહીં, પરંતુ રાજ્યની રાજકીય પકડ અને જનાધારનું પણ પ્રતિબિંબ છે. ભાજપને મળતી સતત આર્થિક મજબૂતી તેને સંગઠન અને ચૂંટણી બંને મોરચે મજબૂત બનાવે છે. આ વચ્ચે કોંગ્રેસ અને AAP માટે આ આંકડા ચિંતાનો વિષય બની શકે છે, કારણ કે મર્યાદિત ફંડિંગના કારણે પ્રચાર અને સંગઠનાત્મક પ્રવૃત્તિઓમાં પડકારો ઊભા થઈ શકે છે. ગુજરાતની રાજનીતિમાં આ આંકડા આગામી દિવસોમાં ચર્ચાનું કેન્દ્ર બનવાની સંભાવના છે.
