દિલ્હીમાંથી એક મોટો પ્રશાસનિક નિર્ણય સામે આવ્યો છે, જ્યાં સરકારે ₹6.2 કરોડના ખર્ચે VIP બોટ ખરીદવાની યોજના રદ્દ કરી દીધી છે. આ સાથે જ આ સમગ્ર મામલામાં સંડોવાયેલા બે અધિકારીઓને સસ્પેન્ડ કરવામાં આવ્યા છે, જેને કારણે રાજકીય અને પ્રશાસનિક સ્તરે ચર્ચાઓ તેજ બની ગઈ છે.
માહિતી અનુસાર, દિલ્હી સરકાર યમુના નદી પર મોનિટરિંગ અને VIP ઇન્સ્પેક્શન માટે બે લક્ઝરી બોટ ખરીદવા જઈ રહી હતી. આ બોટમાં એર-કન્ડીશન્ડ કેબિન, બિઝનેસ ક્લાસ જેવી સીટ્સ, ફૂડ સર્વિસ માટે પેન્ટ્રી અને આધુનિક સુવિધાઓ સામેલ કરવાની યોજના હતી. દરેક બોટમાં 16 થી 20 લોકો બેસી શકે તેવી વ્યવસ્થા પણ રાખવામાં આવી હતી. પરંતુ આ પ્રોજેક્ટ જાહેર થતાં જ વિરોધ પક્ષોએ સરકાર પર જાહેર નાણાંનો બગાડ કરવાનો આરોપ મૂક્યો હતો. આ મુદ્દો મીડિયામાં ઉછળ્યા બાદ સંબંધિત મંત્રીએ તાત્કાલિક તપાસના આદેશ આપ્યા અને ટેન્ડર પ્રક્રિયા રદ્દ કરી દીધી.
ઈરીગેશન અને ફ્લડ કંટ્રોલ વિભાગના મંત્રી પરવેશ વર્માએ જણાવ્યું કે, બોટ ખરીદી માટેની ટેન્ડર પ્રક્રિયા યોગ્ય માહિતી વિના બહાર પાડવામાં આવી હતી. આ કારણે જવાબદાર એક્ઝિક્યુટિવ એન્જિનિયર અને આસિસ્ટન્ટ એન્જિનિયર સામે સસ્પેન્શનની કાર્યવાહી કરવામાં આવી છે.
સરકારે સ્પષ્ટ કર્યું છે કે ભવિષ્યમાં કોઈપણ બોટ ખરીદી માત્ર જરૂરી કામો માટે જ કરવામાં આવશે, જેમ કે નદીનું મોનિટરિંગ, પ્રદૂષણ નિયંત્રણ અને અન્ય ઓપરેશનલ જરૂરિયાતો. આ ઘટનાએ ફરી એકવાર સરકારના ખર્ચ અને પ્રાથમિકતાઓ પર પ્રશ્નો ઊભા કર્યા છે. ખાસ કરીને ત્યારે, જ્યારે યમુના સફાઈ પ્રોજેક્ટ સરકાર માટે મહત્વપૂર્ણ છે, ત્યારે આવી લક્ઝરી બોટ ખરીદીની જરૂરિયાત પર સવાલ ઉઠી રહ્યા છે. હાલમાં, આ મામલે તપાસ ચાલુ છે અને આગામી સમયમાં વધુ ખુલાસાઓ થવાની શક્યતા વ્યક્ત કરવામાં આવી રહી છે.
