યુએસ સુપ્રીમ કોર્ટે ડોનાલ્ડ ટ્રમ્પને મોટો ફટકો આપ્યો છે, અને તેમની ટેરિફ નીતિને ગેરકાયદેસર જાહેર કરી છે. કોર્ટે ચુકાદો આપ્યો છે કે ટ્રમ્પની ટેરિફ લાદવાની પદ્ધતિઓ ખોટી છે. અદાલતે પોતાના મહત્વપૂર્ણ ચુકાદામાં જણાવ્યું કે કટોકટી સત્તાનો ઉપયોગ કરીને અનેક દેશો પર મોટા પ્રમાણમાં આયાત કર લગાવવાનો નિર્ણય કાયદાની મર્યાદા બહાર હતો. આ નિર્ણયને ટ્રમ્પની આર્થિક નીતિ માટે ગંભીર ઝટકો માનવામાં આવી રહ્યો છે. યુએસ સુપ્રીમ કોર્ટે 6 સામે 3ના બહુમતી નિર્ણય સાથે જણાવ્યું કે 1977ના કટોકટી સત્તા કાયદા હેઠળ જે ટેરિફ લાગુ કરાયા હતા, તે કાયદાકીય રીતે હોવા જોઇએ એનાથી પણ ઘણા વઘારે હતા. જે ખરેખર ખોટું છે. અદાલતના મત અનુસાર આ કાયદો અગાઉ પણ લેવાયો હતો અને એ ટ્રમ્પ માટે પણ લાગુ પડશે. તેમને આયાત પર કર લગાવવાની સત્તા આપવામાં આવી નથી. તેથી રાષ્ટ્રપતિ દ્વારા લેવામાં આવેલો નિર્ણય અમાન્ય છે એમ તેમણે આગળ બોલતા જણાવ્યું હતું.
યુએસ સુપ્રીમ કોર્ટના ચીફ જસ્ટિસ જોન રોબર્ટ્સે જણાવ્યું હતું કે, યુએસ કોંગ્રેસ, અથવા સંસદ, ટેરિફ લાદવાનો અધિકાર ધરાવે છે. જો કે, રાષ્ટ્રપતિ પાસે કટોકટી ટેરિફ લાદવાનો અધિકાર નથી. કોર્ટે ટેરિફ લાદવા સંબંધિત ટ્રમ્પના તમામ એક્ઝિક્યુટિવ આદેશોને પણ રદ કર્યા હતા. ઉલ્લેખનીય છે કે એપ્રિલ 2025માં ટ્રમ્પે વેપાર ખાધ ઘટાડવા માટે અનેક દેશો સામે પારસ્પરિક ટેરિફ લાગુ કર્યા હતા. તેમના સમર્થકોનું માનવું હતું કે આ પગલું દેશની અર્થવ્યવસ્થા મજબૂત કરવા માટે જરૂરી હતું. જોકે વિરોધીઓએ તેને સત્તાનો અતિરેક ગણાવ્યો હતો. આ ચુકાદામાં ત્રણ ન્યાયાધીશો, સેમ્યુઅલ એલિટો, ક્લેરેન્સ થોમસ અને બ્રેટ કેવનોઘએ અસહમતિ નોંધાવી હતી. તેમનું માનવું હતું કે કટોકટી પરિસ્થિતિમાં રાષ્ટ્રપતિએ વધુ લવચીકતા રાખવી જોઈએ. છતાં બહુમતી ન્યાયાધીશોએ નિષ્કર્ષ આપ્યો કે કાયદાની હદોને લાંઘીને લેવાયેલા પગલાં સ્વીકાર્ય નથી. આ નિર્ણય બાદ હવે ટેરિફ સંબંધિત સત્તા સ્પષ્ટ રીતે સંસદના હાથમાં રહેશે અને ભવિષ્યમાં આવા નિર્ણય માટે ધારાસભાની મંજૂરી જરૂરી બનશે.
