ક્રિકેટ ચાહકો માટે મહત્વપૂર્ણ સમાચાર સામે આવ્યા છે. BCCI એ IPL 2026 માટે 7 નવા નિયમો જાહેર કર્યા છે, જે 28 માર્ચથી શરૂ થનારી 19મી સીઝનમાં તમામ 10 ટીમો માટે ફરજિયાત રહેશે. આ નિયમો માત્ર મેચ સુધી મર્યાદિત નથી, પરંતુ ખાસ કરીને ટીમોની પ્રેક્ટિસ, ટ્રેનિંગ અને વ્યવસ્થાપન સાથે સીધા જોડાયેલા છે. સૌથી ચર્ચામાં રહેલો નિયમ એ છે કે હવે ખેલાડીઓ તેમના પરિવાર કે મિત્રોને સાથે રાખીને મુસાફરી કરી શકશે નહીં. ટીમ સાથે જતા સમયે તમામ ખેલાડીઓને ટીમ બસનો જ ઉપયોગ કરવો પડશે. આ નિર્ણય ટીમના શિસ્તબદ્ધ સંચાલન અને સુરક્ષાને ધ્યાનમાં રાખીને લેવામાં આવ્યો હોવાનું માનવામાં આવે છે.
પ્રેક્ટિસ સંબંધિત નિયમોમાં પણ મોટા ફેરફારો કરવામાં આવ્યા છે. નવા નિયમ મુજબ, કોઈપણ ટીમને મેચના દિવસે પ્રેક્ટિસ કે ટ્રેનિંગ કરવાની મંજૂરી નહીં હોય. ઉપરાંત, મુખ્ય મેચ પીચ પર 4 દિવસ પહેલાંથી પ્રેક્ટિસ કરવા પર પણ પ્રતિબંધ મૂકવામાં આવ્યો છે, જેથી પીચની ગુણવત્તા જળવાઈ રહે. બીજો મહત્વનો નિયમ એ છે કે હવે ટીમો પ્રેક્ટિસ નેટ્સ શેર કરી શકશે નહીં. દરેક ટીમને અલગ નેટ્સ આપવામાં આવશે અને કોઈ પણ ટીમ બીજી ટીમના નેટ્સનો ઉપયોગ નહીં કરી શકે, જો તે ખાલી હોય તો પણ. આ સાથે જ પ્રેક્ટિસ માટે અલગ-અલગ પ્રવૃત્તિઓ જેવી કે રેન્જ હિટિંગ, થ્રો-ડાઉન અને ડ્રિલ્સ માટે ખાસ વિકેટ ફાળવવામાં આવશે. હોમ ટીમને પ્રેક્ટિસ માટે પ્રથમ પસંદગી મળશે.
પ્રેક્ટિસ મેચોને લઈને પણ કડક નિયમો લાગુ કરવામાં આવ્યા છે. હવે કોઈ પણ ટીમને 2થી વધુ પ્રેક્ટિસ મેચ રમવાની મંજૂરી નહીં મળે. સાથે જ, પ્રેક્ટિસ મેચ માટે BCCI પાસેથી પૂર્વ મંજૂરી લેવી ફરજિયાત રહેશે અને તેની સમય મર્યાદા 3.5 કલાક નક્કી કરવામાં આવી છે. સુરક્ષા અને વ્યવસ્થાને ધ્યાનમાં રાખીને મેદાનમાં LED બોર્ડ પાસે ખેલાડીઓ અને સપોર્ટ સ્ટાફને બેસવા પર પણ પ્રતિબંધ મૂકવામાં આવ્યો છે. આ નિર્ણય ટેકનિકલ અને સલામતી કારણોસર લેવામાં આવ્યો હોવાનું કહેવાય છે. આ નવા નિયમો IPL 2026 ને વધુ શિસ્તબદ્ધ અને વ્યવસ્થિત બનાવવા માટે લાવવામાં આવ્યા છે. હવે જોવાનું એ રહેશે કે ટીમો અને ખેલાડીઓ આ નવા નિયમોને કેવી રીતે અપનાવે છે અને તેનો ટૂર્નામેન્ટ પર શું પ્રભાવ પડે છે.
