નિતિન ગડકરીએ સંસ્કૃતિ અને ભાષા અંગે કહ્યો ચોંકાવનારો કિસ્સો
કેન્દ્રીય મંત્રી Nitin Gadkariએ તાજેતરમાં ઈરાન પ્રવાસ દરમિયાન થયેલી પોતાની એક મહત્વપૂર્ણ મુલાકાતનો રસપ્રદ કિસ્સો જાહેર કર્યો છે. તેમણે જણાવ્યું કે જ્યારે તેઓ શિપિંગ મંત્રી તરીકે ઈરાન ગયા હતા અને ચાબહાર પોર્ટ પ્રોજેક્ટ અંગે ચર્ચા કરવા માટે Ali Khameneiના નિવાસસ્થાને મુલાકાતે ગયા હતા, ત્યારે તેમની વચ્ચે એક અનોખી ચર્ચા થઈ હતી.
ગડકરીએ કહ્યું કે મુલાકાત દરમિયાન ખામેનેઈએ તેમને એક સવાલ પૂછ્યો, “શું તમને ખબર છે કે ફારસી ભાષા ક્યાંથી આવી છે?” ગડકરીએ જણાવ્યું કે તેમને તેનો જવાબ ખબર નહોતો. ત્યારબાદ ખામેનેઈએ પોતે જ કહ્યું કે ફારસી ભાષાનું મૂળ સંસ્કૃતમાં છે અને સંસ્કૃત જ તેમની મૂળ ભાષા છે. આ કિસ્સો જણાવતા ગડકરીએ ભારત અને પશ્ચિમ એશિયા વચ્ચેના પ્રાચીન સાંસ્કૃતિક સંબંધોને પણ ઉજાગર કર્યા. તેમણે જણાવ્યું કે ઈરાનની અનેક યુનિવર્સિટીઓમાં આજે પણ સંસ્કૃત વિભાગ કાર્યરત છે અને ત્યાં સંસ્કૃત અધ્યયન માટે ખાસ વ્યવસ્થા કરવામાં આવી છે.
ગડકરીએ પોતાના પ્રવાસના અન્ય અનુભવો પણ શેર કર્યા. તેમણે કહ્યું કે તેઓ ઈરાનમાં ચાબહાર પોર્ટના વિકાસ માટે અનેક વખત ગયા હતા. એક વખત તેઓ ડિફેન્સ ફ્લાઈટ દ્વારા પાછા ફરતા હતા ત્યારે પાકિસ્તાન દ્વારા તેમની ફ્લાઈટને મધ્યમાં રોકી દેવામાં આવી હતી, જેના કારણે તેમને ગુજરાત મારફતે ભારત પરત ફરવું પડ્યું હતું. તેમણે વધુમાં ઉમેર્યું કે સિંધુ નદીના વિસ્તાર સાથે જોડાયેલા દેશો જેમ કે ઈરાન, અફઘાનિસ્તાન, પાકિસ્તાન અને ઉઝબેકિસ્તાન સાથે ભારતના ઐતિહાસિક અને સાંસ્કૃતિક સંબંધો ઘણાં ગાઢ રહ્યા છે. આ સંબંધો આજે પણ વિવિધ રીતે દેખાઈ આવે છે.
આ સમગ્ર પ્રસંગે ગડકરીએ ભારતની પ્રાચીન સંસ્કૃતિ અને વૈશ્વિક જોડાણોને ઉજાગર કરતાં જણાવ્યું કે ભાષા, સંસ્કૃતિ અને ઈતિહાસ દ્વારા દેશો વચ્ચે ગાઢ સંબંધો રચાયેલા છે, જેને સમજવાની જરૂર છે.
