ઝારખંડમાંથી એક હૃદયદ્રાવક ઘટના સામે આવી છે. Ranchi થી Delhi જઈ રહેલી એર એમ્બ્યુલન્સ ઝારખંડના ચાત્રા જિલ્લામાં સિમરિયા નજીક દુર્ઘટનાગ્રસ્ત થઈ ગઈ હતી. આ દુર્ઘટનામાં વિમાનમાં સવાર તમામ સાત લોકોના મોત થયા હોવાનું અધિકારીઓએ પુષ્ટિ કરી છે. શરૂઆતમાં એક વ્યક્તિના મોતની માહિતી મળી હતી, પરંતુ બાદમાં તમામ સાતેયના મોત થયાની માહિતી સત્તાવાર રીતે જાહેર કરવામાં આવી.આ એર એમ્બ્યુલન્સ મેડિકલ ઇવેક્યુએશન મિશન પર હતી અને તેમાં ગંભીર રીતે દાઝેલા દર્દીને વધુ સારવાર માટે દિલ્હી લઈ જવાઈ રહ્યો હતો. વિમાનનું સંચાલન Redbird Airways Pvt Ltd દ્વારા કરવામાં આવી રહ્યું હતું. માહિતી મુજબ વિમાન રાંચીથી સાંજે 7:11 વાગ્યે ઉડાન ભર્યું હતું અને લગભગ રાત્રે 10 વાગ્યે દિલ્હી પહોંચવાનું હતું.
પરંતુ ઉડાન ભર્યા પછી થોડા જ સમયમાં વિમાન સાથેનો સંપર્ક તૂટી ગયો. Directorate General of Civil Aviation મુજબ સાંજે 7:34 વાગ્યે કોલકાતા સાથેનો રડાર અને કોમ્યુનિકેશન સંપર્ક અચાનક તૂટી ગયો હતો. ત્યારબાદ થોડા સમય પછી વિમાન ચાત્રા જિલ્લાના જંગલ વિસ્તારમાં ક્રેશ થયું હોવાની માહિતી મળી.આ દુર્ઘટનામાં પાયલટ કેપ્ટન વિવેક વિકાસ ભગત અને કો-પાયલટ કેપ્ટન સવરજદીપ સિંહ સહિત કુલ સાત લોકોના મોત થયા છે. મૃતકોમાં 41 વર્ષીય દર્દી સંજય કુમાર, તેમની સાથે રહેલા અર્ચના દેવી અને ધુરુ કુમાર, ડૉ. વિકાસ કુમાર ગુપ્તા તથા પેરામેડિક સચિન કુમાર મિશ્રાનો સમાવેશ થાય છે. ઘટનાસ્થળેથી તમામ મૃતદેહોને બહાર કાઢવામાં આવ્યા છે.
માહિતી મુજબ સંજય કુમાર ઝારખંડના લાતેહાર જિલ્લાના ચાંદવા વિસ્તારના રહેવાસી હતા અને તેમને 65 ટકા જેટલી ગંભીર દાઝની ઈજા થઈ હતી. તેમને અગાઉ રાંચીના હોસ્પિટલમાં દાખલ કરવામાં આવ્યા હતા, પરંતુ વધુ સારી સારવાર માટે પરિવારજનોએ તેમને દિલ્હી ખસેડવાનો નિર્ણય કર્યો હતો. સોમવારે બપોરે હોસ્પિટલમાંથી ડિસ્ચાર્જ કર્યા બાદ તેમને એર એમ્બ્યુલન્સ દ્વારા દિલ્હી મોકલવામાં આવી રહ્યા હતા.
આ સમગ્ર ઘટનાની તપાસ માટે Aircraft Accident Investigation Bureau ની ટીમને ઘટનાસ્થળે મોકલવામાં આવી છે. તપાસ દરમિયાન ટેકનિકલ ખામી, હવામાન પરિસ્થિતિ અને અન્ય સંભવિત કારણોની તપાસ કરવામાં આવશે. આ દુર્ઘટનાએ સમગ્ર રાજ્યમાં શોકની લાગણી ફેલાવી દીધી છે અને લોકોમાં ભારે ચકચાર મચી છે.
